काठमाडौं– प्रधानमन्त्री पुष्पकमल दाहाल प्रचण्ड र गठबन्धनको मुख्य घटक एमाले अध्यक्ष केपी ओलीबीच पछिल्लो राजनीतिक घटनाक्रम वरिपरि रहेर छलफल भएको छ। बुधबार प्रचण्डलाई भेट्न एमाले अध्यक्ष ओली प्रधानमन्त्रीको सरकारी निवास बालुवाटार पुगेका हुन्।
दुई शीर्ष नेताबीच पछिल्लो विकसित राजनीतिक घटनाक्रमबारे छलफल भइरहेको बताइएको छ। नागरिकता प्रकरणमा गृहमन्त्रीबाट हटेका रवि लामिछानेले फेरि सोही पद पाउनुपर्ने अडान लिएपछि पछिल्लो समय गठबन्धनभित्र मतभेद बढ्दै गएको छ।
एमाले लामिछानेलाई गृहमन्त्रीमा पुनः ल्याउनुपर्ने अडानमा छ भने माओवादी केन्द्र र प्रधानमन्त्री प्रचण्डले लामिछानेविरुद्ध राहदानीलगायत विवाद कायमै रहेको दाबी गरेर गृह मन्त्रालय आफैंसँग राख्न चाहेका छन्। राष्ट्रिय स्वतन्त्र पार्टीले सात दलीय गठबन्धनको सहमतिअनुसार गृह मन्त्रालय नदिइए सरकारबाट बाहिरिने चेतावनी दिइसकेको छ।