पठानको सिक्वेल बन्यो भने अझै मेहनत गर्छु: शाहरुख

काठमाडौं- शाहरूख खान र दीपिका पादुकोण अभिनित फिल्म ‘पठान’ ले बक्स अफिसमा उधुम मच्चाइरहेको छ। २५ जनवरीमा रिलिज भएको फिल्मले आज सातौं दिनसम्म पनि दैनिक सय करोड कमाइरहेको छ। 

पठानले पहिलो दिनमै विश्वभरबाट १०६ करोड भारू कमाउँदै सर्वाधिक कमाउने हिन्दी फिल्मको रेकर्ड राखेको थियो। बलिउड बजार विश्लेषक तरण आदर्शका अनुसार फिल्मले पाँच दिनमै ५४२ करोड भारू कमाएको छ। फिल्मले भारतीय बक्स अफिसमा ३३५ करोड र अन्य देशबाट २०७ करोड कमाएको हो। 

यसैबीच पठानका मुख्य अभिनेता शाहरुख खानले ‘पठान २’ बनेको खण्डमा आफू नै खेल्ने बताएका छन्। मुम्बईमा आयोजित पत्रकार सम्मेलनमा उनले भने, ‘पठानको सफलतापछि मेरो परिवार निकै खुशी छन्। यदि यस फिल्मको सिक्वेल बन्यो भने म निकै मेहनत गर्छु। पठान २ मा कपाल अझै लामो बनाउँछु,’ उनले भने। 

पत्रकार सम्मेलनमा शाहरूख, दीपिका, जोन अब्राहम र निर्देशक सिद्धार्थ आनन्द उपस्थित थिए। यो पठानको पहिलो पत्रकार सम्मेलन हो। निर्माण टिमले प्रदर्शन हुनुअघि फिल्मको प्रमोसन गरेको थिएन। शाहरूखले फिल्मको व्यापारभन्दा पनि दर्शकको माया नै ठूलो उपहार भएको बताए। उनले भने, 'मलाई फिल्म हिट भएन भने पनि दर्शकले उत्तिकै माया दिन्छन्। मलाई घरका ठूला व्यक्तिले भनेका थिए- दुःखी भयौ भने आफूलाई माया गर्ने मान्छेको नजिक जाऊ। केही काम चलेन या जिन्दगीमा केही नराम्रो भइरहेको छ भने यसो गर भन्दै उपदेश दिने मान्छेको नजिक नजाऊ। म निकै भाग्यमानी छु कि मसँग लाखौं करोडौं माया गर्ने मान्छे छन्। जब म दु:खी हुन्छु, बार्दलीमा आउँछु, जब म खुशी हुन्छु त्यतिबेला पनि बार्दलीमा आउँछु।’

सिद्धार्थ आनन्दले निर्देशन गरेको फिल्ममा शाहरूख खान, दीपिका पादुकोण र जोन अब्राहमसँगै सलमान खानको केमियो भूमिका छ। यस फिल्ममार्फत शाहरूखले चार वर्षपछि कमब्याक गरेका हुन्।