नेपाल भारतसँग १७१ रनले पराजित

१९ वर्षमुनिको एशिया कप क्रिकेटमा नेपाल भारतसँग पराजित भएको छ । शनिबार भएको यू–१९ एशिया कप क्रिकेटको पहिलो खेलमा नेपाल भारतसँग १७१ रनले पराजित भएको हो ।

३०४ रनको लक्ष्य पछ्याएको नेपालले ३६.५ ओभरमा १३३ रनमा समेटिएको थियी । पहिलो विकेटका लागि राजेन्द्र साह र रवि साहले ३१ रनको साझेदारी गरेको थिए । नवौं ओभरको पहिलो बलमा राजेन्द्र ११ रनमा आउट हुँदा अर्को ओभरमा रवि पनि व्यक्तिगत १६ रनको स्कोरमा आउट भए ।

त्यसपछि कप्तान आसिफ शेख र सन्दिप जोराले तेस्रो विकेटका लागि २९ रनको साझेदारी गरे । टिमको स्कोर ६० हुँदा तेस्रो विकेटका रुपमा सन्दीप २० रन बनाएर आउट भए ।

रोहित पौडेल र कप्तान आसिफले चौथो विकेटका लागि ३६ रनको साझेदारी गरेको थियो । यो नै नेपालको उच्च साझेदारी हो । कप्तान आसिफले २५ र रोहितले २४ रन बनाए ।

नेपालको बाँकी ६ जना ब्याट्सम्यानले दोहोरो अंकको रन छुन सकेनन् । दुई खेलाडी शून्यमै आउट भएका थिए । बलिङतर्फ भारतका सिद्धार्थ देसाइ र हर्ष त्यागीले तीन तीन विकेट लिए ।

यसअघि बंगलादेशको साभारस्थित मैदानमा भएको खेलमा टस हारेर ब्याटिङ गरेको भारतले निर्धारित ५० ओभरमा ९ विकेट गुमाउँदै ३०४ रन बनाएको थियो । भारतका लागि यशाभी जैसवालले १०४ रनको शतकीय योगदान दिए । यस्तै प्राव सिमरन सिंहले ८२ रन बनाए भने आयुष बादोनीले ३० तथा देबदत्त पादिक्कलले ३० रन जोडे ।

बलिङतर्फ भीम शार्कीले ४ विकेट लिँदा राशिद खानले दुई विकेट हात पारे । यस्तै कमलसिंह ऐरी, सागर ढकाल र सन्दिप जोराले १–१ विकेट लिए ।