ठूला दलका नेता राजा भएपछि संसद्को गरिमा धुलिसात् : सीके राउत

काठमाडौं– सत्तारुढ जनमत पार्टी अध्यक्ष डा. चन्द्रकान्त (सीके) राउतले ठूला दलका नेताहरू जनप्रतिनिधि थलोमा राजाजस्तै गरेर आउने र तुरुन्तै फर्किहाल्ने प्रवृत्तिले संसद्को गरिमामा ठेस पुगेको टिप्पणी गरेका छन्।

मंगलबार प्रतिनिधिसभा बैठकमा नवनिर्वाचित सभामुख र उपसभामुखलाई बधाइ तथा शुभकामना दिने क्रममा अध्यक्ष राउतले यस्तो बताएका हुन्।

उनले सांसदलाई बोल्न दिइने गरेको समयमा पुनर्विचार गर्न सभामुख देवराज घिमिरेको ध्यानाकर्षण गराए। राउतले भने, ‘संसद्मा सांसदलाई बोल्न समय दिने विषयमा पुनर्विचार गर्नुपर्दछ। संसद् सञ्चालन नियमावलीमा मन्त्रीहरूको उपस्थिति अनिवार्य हुनुपर्छ। संसद्को नियम स–साना पार्टीलाई मात्रै लाग्ने हो कि ठूला पार्टीहरूलाई पनि हो?’ 

संविधानको भावनाअनुसार संसद् नियमावली संशोधन गर्नुपर्ने देखिएको उनले बताए। उनले भने, ‘२०७५ भदौमा हाम्रो पार्टीका एक कार्यकर्तालाई कुनै मन्त्रीलाई प्रश्न सोध्न आयो भन्ने आरोपमा प्रहरीले गिरफ्तार गरेर हिरासतमा राख्दा उनको मृत्यु भएको थियो। यो प्रकरणलाई संसद्मा उठाउँदा तत्कालीन गृहमन्त्रीबाट उनको नाम यहाँ उच्चारण गर्न पाइँदैन भनिएको थियो। त्यो अलोकतान्त्रिक अभ्यास यस पटक नहुने ग्यारेन्टी चाहन्छु।’