सभामुखले बोलाए सर्वदलीय बैठक

काठमाडौं- सभामुख देवराज घिमिरेले सर्वदलीय बैठक बोलाएका छन्। उपसभामुव चुनावको कार्यतालिकासहित आज बस्न लागेको प्रतिनिधिसभा बैठकअघि बिहान ११ बजेका लागि उनले सर्वदलीय बैठक डाकेका हुन्। संसद् भवन, नयाँ बानेश्वर शंकर हलमा बैठक बस्ने छ। 

आज प्रतिनिधिसभाको १ बजेपछि बस्ने बैठकमा उपसभामुख चयनका लागि निर्वाचन हुँदै छ। हिजो शुक्रबार उम्मेदवारी दर्ता गरिएको थियो।

उपसभामुखमा सत्ता गठबन्धनका तर्फबाट राष्ट्रिय स्वतन्त्र पार्टीकी इन्दिरा रानामगरले उम्मेदवारी दर्ता गराएकी छन्। नेपाली कांग्रेसका तर्फबाट मुक्ताकुमारी यादवको उम्मेदवारी परेको छ। यादवलाई उपसभामुख बनाउनुपर्ने प्रस्तावमा कांग्रेस सांसद बद्रीप्रसाद पाण्डे प्रस्तावक छन् भने लोसपाका सर्वेन्द्रनाथ शुक्ला र एकीकृत समाजवादीका मेटमणि चौधरी समर्थक छन्।

रानामगरको प्रस्तावकमा रास्वपाकै सोविता गौतम छिन् भने समर्थकमा माओवादी केन्द्रका नारायणी शर्मा, राप्रपाका राजेन्द्र लिङ्देन र एमालेका कृष्णगोपाल श्रेष्ठ छन्।