कांग्रेसबाट उपसभामुखको प्रत्यासीमा मुक्ता यादव

काठमाडौं– बिहीबार मात्रै संघीय प्रतिनिधिसभाको सभामुखमा उम्मेदवारी दिएर हार बेहोरेको नेपाली कांग्रेसले उपसभामुखमा पनि उम्मेदवारी दर्ता गराउने भएको छ।

शुक्रबार बिहान सभापति शेरबहादुर देउवा निवास धुम्बाराहीमा बसेको पदाधिकारी बैठकले उपसभामुखमा मुक्ता यादवलाई उठाउने निर्णय गरेको हो। कांग्रेस केन्दीय सदस्यसमेत रहेकी यादव समानुपातिक सांसद हुन्।

कांग्रेसले सभामुखमा ईश्वरी न्यौपानेलाई उम्मेदवार बनाएको थियो। उनी एमालेका देवराज घिमिरेसँग पराजित भएकी थिइन्। सत्ता गठबन्धनबाट उपसभामुखमा राष्ट्रिय स्वतन्त्र पार्टीले इन्दिरा रानालाई उम्मेदवार घोषणा गरेको छ।

विपक्षी गठबन्धनमा सम्बद्ध एकीकृत समाजवादी, लोसपा र राष्ट्रिय जनमोर्चासँग महिला सांसद नभएकाले कांग्रेसले नै उपसभामुखमा उम्मेदवारी दिन लागेको हो। सभामुख र उपसभामुखमध्ये एक जना महिला हुनुपर्ने संवैधानिक व्यवस्था छ।

धुम्बाराही बैठकले उपसभामुख उम्मेदवार तयर गरेपछि सत्ताबाहिरका अन्य दलसँग पनि छलफल गर्ने निर्णय गरेको छ। सभामुखको निर्वाचनमा कांग्रेसलाई नेकपा एस, राष्ट्रिय जनमोर्चाले साथ दिए पनि सत्ता गठबन्धनका उम्मेदवारले जित हात पारेका थिए।