एसिया कप : उपाधिका लागि भारत र बंगलादेश भिड्ने

काठमाडौं-युएयमा जारी एसिया कप क्रिकेटमा पाकिस्तानलाई पराजित गर्दै बंगलादेश फाइनलमा पुगेको छ । बंगलादेशले पाकिस्तानलाई ३७ रनले पराजित गर्दै फाइनलमा पुगेको हो । अब फाइनल खेलमा बंगलादेशले उपाधिका लागि भारतको सामना गर्ने छ । फाइनल खेल भने शुक्रबार हुने छ ।

बुधबार राती भएको सुपर फोरको अन्तिम खेलमा २ सय ४० रनको लक्ष्य पक्ष्याएको पाकिस्तान निर्धारित ५० ओभरमा ९ विकेटको क्षतिमा मात्र २ सय २ रन बनाउन सक्यो । 

खराब सुरुवात गरेको पाकिस्तानलाई शोएब मालिक र इमाम उल हकले सम्हाल्ने प्रयास गरे पनि धेरै लामो समय टिक्न सकेनन् । पहिलो ओभरको ५ बलमै फखार जमान १ रनमा तथा दोस्रो ओभरको तेस्रो बलमा बाबर आजम १ रनमा पेभिलिएन फर्कंदा पाकिस्तान थप दबाबमा आयो ।

एक समय पाकिस्तान ४ ओभरमै १८–३ को दयनिय स्थितिमा पुगेको थियो । चौथो विकेटका लागि इमाम र मलिकले ६७ रनको साझेदारी गर्दै केहि आशा दिलाएका थिए । तर मालिक पनि २१ औं ओभरमा व्यक्तिगत ३० रनमा आउट भएपछि पाकिस्तान थप दवावमा आयो ।

छैटौं विकेटका लागि आसिफ अली र इमामले ७१ रनको साझेदारी गर्दै टिमलाई हारबाट जोगाउने प्रयास गरेपनि त्यो साझेदारी जितको लागि पर्याप्त हुन सकेन । पाकिस्तानले निरन्तर विकेट गुमाउँदा बंगलादेशले खेलमा पकड बनायो । पाकिस्तानका लागि इमामले १०५ बलमा २ चौका र १ छक्का प्रहार गर्दै ८३ रन बनाए पनि त्यो फाइनल सम्म पुग्नको लागि टिमलाई प्रयाप्त रन हुने सकेन ।

त्यस्तै अलीले ३१ रन र शाहीन शाह अफ्रिदीले १४ रन बनाउन बाहेक अन्य कुनै पनि ब्याट्सम्यानले दोहोरो अंक दोहोरो अंक छुन सकेनन् । बंगलादेशका लागि मुस्ताफिजुर रहमानले उत्कृष्ट बलिङ गर्दै ४ विकेट लिए । त्यस्तै मेहन्दी सहन मिराज २ विकेट लिदाँ रुबेल हसन, सौम्य सरकार र महामुदुल्लाहले समान १ विकेट लिए ।

त्यसअघि युएईको आबुधावीमा टस जितेर पहिला ब्याटिङ गरेको बंगलादेश ४८ ओभर ५ बलमा अल आउट हुँदै २ सय ३९ रन बनाउन सकेको थियो । मोहमम्द मिथुन र मुश्फिकर रहिमले १ सय ४४ रनको शतकीए साझेदारी नै बंगलादेशलाई जितको बलियो आधार बन्यो । 

रहिमले ११६ बलमा ९ चौकाको सहयोगमा ९९ रनमा आउट भए । रहिम करियरको ७ औ शतक बनाउन १ रनले चुके । रहिम ४१ ओभर ४ बलमा शाहीन शाह अफ्रिदीले कप्तान शरफराजको हातबाट क्याच आउट गराउदैँ ९९ रनमा पेभिलिएन फर्किएका थिए । मिथुनले ६०, महामुदुल्लाह २५, इमरुल कायेस ९,मेहन्दी हसन मिराज १२ र कप्तान मशरफी मुर्तजा १३ रन बनाउन सके । 

पाकिस्तानको लागि जुनैद खानले उत्कृष्ट बलिङ गरेपनि टिमको जितको लागि एक्लो प्रयास सफल हुन सकेन । उनले ९ ओभरमा १ मेडन राख्दै १९ रन खर्चेर ४ विकेट लिए । त्यस्तै शाहीन शाह अफ्रिदी र हसन अलीले समान २ विकेट लिदा सादव खानले १ विकेट लिएका थिए ।