स्थायी राजधानी र नामप्रति असन्तुष्टि जनाउँदै विरोध प्रदर्शन

धनगढी- प्रदेश ७ को स्थायी राजधानी र नामाकरणका विषयमा असन्तुष्टि जनाउँदै नेपाली काँग्रेसले प्रदेश सभा अगाडी विरोध प्रर्दशन गरेको छ। 

दिउँसो १ बजेबाट प्रदेश सभा बैठक शुरु भएलगत्तै नेपाली काँग्रेसले गेटमा प्रदर्शन शुरु गरेको हो। प्रदेशको स्थायी राजधानी धनगढीबाट बाहिर सार्न पाईदैन भन्दै काँग्रेसले सभा भवन बाहिर प्रदर्शन जारी राखेको छ।

वन तथा भूमाफिया सरकार मुर्दाबादका नारा लगाउँदै काँग्रेसले करिव दुई घण्टा देखि गेटमै टायर बालेर प्रदर्शन गरिरहेको छ । बिरोेध प्रदर्शनमा धनगढी भन्दा बाहिर राजधानी नचाहाने र प्रदेशको नाम पनि सुदूरपश्चिम नचाहानेहरुको बाक्लो उपस्थिती छ। 

कैलालीको गोदावरी-४ मा प्रदेश राजधानी र नाम सुदूरपश्चिम राख्न बिशेष समितिले प्रस्ताव गरेपछि बिरोध सुरु भएको हो। गोदावरीमा स्थायी राजधानी राखेर वन मास्न खोजेको आरोप आन्दोलनरत पक्षले लगाएको छ।

प्रदेश सदस्यहरुलाई सभाहल भित्रबाट बाहिर आउन नदिने भन्दै आन्दोलनकर्मीहरुले आन्दोलन गरेका छन्।