नेकपा एसको केन्द्रीय सचिवालय सदस्य मनोनीत भए घनश्याम

काठमाडौं– शुक्रबार मात्रै माधवकुमार नेपाल नेतृत्वको नेकपा एसमा प्रवेश गरेका वामपन्थी नेता घनश्याम भुसाललाई केन्द्रीय सचिवालय सदस्यमा मनोनीत गरिएको छ। शनिबार पार्टी कार्यालय तीनकुनेमा बसेको सचिवालय बैठकले भुसाललाई सचिवालय सदस्यमा मनोनीत गरेको हो।

भुसाललाई आजै भर्चुअल माध्यमबाट स्थायी कमिटी बैठक राखेर अनुमोदन गरेको महासचिव डा. वेदुराम भुसालले बताए। नेता नेपालले एमाले विभाजन गरेको डेढ वर्षपछि भुसाल समाजवादीमा प्रवेश गरेका हुन्। 

एमालेमा रहँदा भुसाल माधव नेपाल समूहमै थिए।  गत ४ मंसिरको निर्वाचनमा एमालेले टिकट नदिएपछि उनी पार्टी छाडेर स्वतन्त्र रूपमा रुपन्देही १ मा उठे पनि पराजित भए।