एटलेटिको म्याड्रिड लिगको तेस्रो स्थानमा उक्लियो

स्पेन (एजेनसी)-ला लिग अन्तर्गत मंगलबार राती भएको खेलमा एटलेटिको म्याड्रिडले हुएस्कालाई पराजित गरेको छ । आफ्नो घरेलु मैदानमा भएको खेलमा मड्रिडले हुएस्कलाई ३-० ले पराजित गरेको हो । मड्रिडले तीनवटै गोल खेलको पहिलो हाफमा गरेका थियो ।

लिगमा केहि कमजोर सुरुआत गरेको एटलेटिकोले मंगलबार भने उत्कृष्ट सुरुआत गर्यो । एटलेटिकोका लागि एन्टोइन ग्रिज्मनले १६ औं मिनेटमा सहजै गोल गर्दै खाता खोलेका थिए । 

त्यसको १५ मिनेटमा थोमस पार्टेले लामो दुरीबाट गरेको शक्तिशाली प्रहार गोलमा परिणत भएपछि अग्रता दोब्बर भयो । ३५ औं मिनेटमा हुएस्काका गोलरक्षक एक्सल वेर्नर र एटलेटिको फरवार्ड एन्जल कोर्रिया दुवैले कोकेको पास लिन अगाडी बढ्दा चुकेपछि उक्त पास नै गोलमा परिणत भएको थियो ।

यसै साता हुने डर्बीका लागि प्रशिक्षक डिएगो सिमिओनीले साउल निगुएज, रोड्रीगो र जानफ्रानलाई विश्राम दिएपनि त्यसले असर भने परेन । पूर्ण दबाब बनाएको पहिलो हाफमा डिफेन्डर जोसे जिमिनेज चोट लाग्दै मैदान छाड्नु भने दुखद रहयो ।

यस जितसँगै एटलेटिको तेस्रो स्थानमा उक्लिएको छ । शीर्ष दुई स्थानमा महारथी रियल म्याड्रिड र बार्सिलोना नै कायम छन् । दुवै टोलीले अहिलेसम्म कुनै खेलमा पराजय भोगेका छैनन् । हारसँगै हुएस्का भने जितविहिन रहँदै १८ औं स्थानमा झरेको छ ।