भलिबल च्याम्पियनसिपमा महिलातर्फ एपिएफको जित, न्यु डायमन्ड सेमिफाइनलमा

काठमाडौं–  काठमाडौंमा जारी सातौं संस्करणको एनभीए महिला तथा पुरुष भलिबल क्लब च्याम्पियनसिपको मंगलबार विहानको खेलमा उपाधि दाबेदार नेपाल एपिएफ क्लबले जित निकालेको छ। त्रिपुरेश्वरस्थित राष्ट्रिय खेलकुद परिषद (राखेप) को कभर्डहलमा सम्पन्न खेलमा एपिएफले गण्डकी प्रदेशलाई ३–० को सोझो सेटमा हराउँदै पहिलो जित दर्ता गराएको हो। 

पहिलो सेटमा गण्डकी प्रदेशले १५ अंब बनाउँदै विभागीय टिमले निर्धारित २५ अंक पुरा गरेको थियो। पहिलो सेटमै सहज जित निकालेको उसले बाँकी खेलमा पनि उस्तै जित निकाल्यो। पछिल्ला दुवै सेट क्रमश २५–१० र २५–११ ले आफ्नो पक्षमा पार्दै एपिएफले लिगको समूह बीमा पहिलो तीन अंक जोड्न सफल भएको हो। एपिएफकी स्पाइकर सरस्वती चौधरी खेलमा उत्कृष्ट भइन।

गण्डकीले यो प्रतियोगिताका लागि तीन भारतीय खेलाडी बोलाएको थियो। तर विदेशी खेलाडी नेपाल आउन नपाउँदा उसले नेपाली खेलाडीहरुलाई नै खेलाइरहेको छ। समूह बीमा आर्मीको पनि ३ अंक छ भने गण्डकी र कृष्ण सेकेन्डरी एकेडेमीले खाता खोल्न सकेको छैनन्।

आजै भएको दोस्रो खेलमा एभरेस्ट एकेडेमीविरुद्ध जित निकाल्दै होङ्गान्जी न्यु डायमन्ड युथ स्पोर्ट्स क्लब सेमीफाइनलमा प्रवेश गरेको छ। साविक विजेतासमेत रहेको न्यु डायमण्ड समूह चरणको एक खेल बाँकी छँदै च्याम्पियनसिपमा महिलातर्फ सेमिफाइनलमा प्रवेश गरेको हो।

डायमन्डले लगातर दुई खेलमा जित निकालेसँगै नेपाल पुलिस क्लब पनि एक खेल अगावै सेमिफाइनलमा पुगेको छ। यता, एभरेस्ट र नयाँ बजार सामाजिक युवा क्लब भने अंक विहीन हुँदै बाहिरिएको छ।

कभर्डहलमा मंगलबारको दोस्रो खेलमा डायमन्डले एभरेष्टमाथि ३–० को सोझो सेटमा जित निकालेको हो। खेलको पहिलो सेटमा २५–७, दोस्रो सेट २५–१० ले आफ्नो पक्षमा पारेको न्यु डायमन्डले तेस्रो सेटमा २५–१२ खेल आफ्नो पक्षमा पार्यो। यो जितसँगै डायमन्डले समूह ‘ए’ मा २ खेलबाट ६ अंक बनाएको छ। पुलिसको पनि समान २ खेलबाट ६ अंकका साथ सेमीफाइनल पुगेको हो।