जनकपुर मैदानमा नआएपछि टसमा ढिलाइ

काठमाडौं– काठमाडौंमा जारी पहिलो संस्करणको नेपाल टी–२० लिगअन्तर्गत दोस्रो क्वालिफायर खेलमा पनि टसमा ढिलाइ भएको छ। दोस्रो क्वालिफायरमा आज विराटनगर सुपर किंग्सले जनकपुर रोयल्सको सामना गरिरहेको छ।

आजको खेल दिउँसो १२ बजेबाट सुरु हुनुपर्ने हो। तर जनकपुर समयमै मैदान नआइपुगेपछि टस ढिलो हुने भएको हो। खेलाडीको पारिश्रमिकको विषयलाई लिएर लिगको बीचमै समस्या भइरहेको छ।

यसै विषयले धेरै खेलको टसमा ढिलाइ भइरहेको छ। पारिश्रमिकको कुरा के भन्ने प्रश्नमा अघिल्लो खेलपछि जनकपुरका सिनियर खेलाडी सोमपाल कामीले भनेका थिए, ‘तपाईंहरूलाई जे लागिरहेको छ, त्यो कुरा सत्य हो। खेलाडीहरू स्वतन्त्र रुपले खेल्न सकिरहेका छैनन्। यस्तै कारणले हाम्रो टिमको म्याच विनर खेलाडी होटलमै छन्।’

लिगको समय नेपाल क्रिकेट संघ(क्यान)सँग पहिले वार्ता भएको थियो। त्यसैले यसअघिसम्म सोमपालसहित जनकपुर टिम विश्वस्त थियो। उनले भनेका थिए, ‘केही–केही पेमेन्ट मात्र भइरहेको छ। अब एक–दुई दिनमा पूरा हुन्छ होला।’

एक खेल अघिसम्म जनपुरका खेलाडीले ६५ प्रतिशत मात्र पारिश्रमिक पाएका थिए। तर सम्झैताअनुसार लिग नसकिँदै सबै पैसा दिनुपर्ने हुन्छ। क्लबका मालिक पनि विश्वस्त नभएको दाबी छ। आजको खेलमा समयमै उपस्थित नहुनु भनेको उनीहरूले पैसा पाएका छैनन भन्ने नै हो।