इलिमिनेटरमा विराटनगर र काठमाडौं भिड्दै

काठमाडौं – नेपाल टी–२० लिगमा आज इलिमिनेटर खेल हुँदैछ। कीर्तिपुरको त्रिवी क्रिकेट मैदानमा जारी लिगअन्तर्गत इलिमिनेटर खेलमा विराटनगर सुपर किंग्सले काठमाडौं नाइट्सको सामना गर्न लागेको हो।

लिगमा विराटनगरले तेस्रो स्थान हाँसिल गरेको थियो भने काठमाडौं चौथो भएको थियो। लिगमा औषत सुरुआत गरेको काठमाडौं र कमजोर सुरुआत गरेको विराटनगर इलिमिनेटर राउन्डमा भेट भएका हुन्। लिगमा विराटनगरले १० अंक बनाएको थियो भने काठमाडौंले आठ अंक बनाएको थियो।

आज दुवै टिम दोस्रो क्वालिफायरमा पुग्ने लक्ष्यका साथ मैदान प्रवेश गर्नेछन्। दिउँसो १२ बजेबाट सुरु हुने खेलको विजेता टिमले भने दोस्रो क्वालिफायरमा जनकपुर रोयल्सको सामना गर्नेछ।

जनकपुरले पहिलो क्वालिफायरको खेलमा लुम्बिनी अलस्टार्ससँग ६ रनको हार बेहोरेको थियो। यता लुम्बिनी भने फाइनल पुगिसकेको छ।