मुख्यमन्त्री कार्कीको सपथ आज, ५ सदस्यीय मन्त्रिपरिषद् गठनको तयारी

विराटनगर- प्रदेश १ को मुख्यमन्त्रीमा नियुक्त एमाले संसदीय दलका नेता हिक्मतकुमार कार्कीले सोमबार (आज) पद तथा गोपनियताको सपथ लिँदैछन्। दिउँसो २ बजे मुख्यमन्त्रीमा नियुक्त कार्कीलाई सपथ गराउने कार्यक्रम निर्धारण गरिएको प्रदेश प्रमुखको कार्यालयले जनाएको छ।

नेपालको संविधानको धारा १६८ को उपधारा २ बमोजिम माओवादी केन्द्र, राष्ट्रिय प्रजातन्त्र पार्टी (राप्रपा) र जनता समाजवादी पार्टी (जसपा) को समर्थनमा उनलाई प्रदेश प्रमुख पर्शुराम खापुङले आईतबार साँझ मुख्यमन्त्रीमा नियुक्त गरेका हुन। मुख्यमन्त्रीमा कार्कीलाई एमालेका ४० सहित माओवादीका १३, राप्रपाका ६ र जसपाका १ सांसद गरि ९३ सदस्यीय प्रदेशसभाको बहुमत सांसदको समर्थन रहेको छ। 

मुख्यमन्त्रीको सपथ ग्रहण गरे लगत्तै कार्कीले सानो आकारको मन्त्रिपरिषद् गठनको तयारी गरेका छन्। एमाले नेतृत्वको सरकारलाई समर्थन गर्ने माओवादी केन्द्र, राप्रपा र जसपाबाट १–१ जनाको प्रतिनिधित्व हुने गरि मन्त्रिपरिषद् गठनको तयारी गरेको श्रोतको भनाई छ। पहिलो चरणको मन्त्रिपरिषद् गठनमा एमालेबाट पनि एक जना गरि ५ सदस्यीय हुने बताइएको छ। एमालेबाट पूर्व प्रतिनिधिसभा सदस्य समेत भइसकेका ताप्लेजुङ १ (क) बाट निर्वाचित तिलकुमार मेन्याङ्बो, माओवादीबाट तेह्रथुमको १ (ख) बाट निर्वाचित दुर्गाप्रसाद चापागाई, राप्रपाबाट झापा ४(ख) बाट निर्वाचित तथा संसदीय दलका नेता भक्तिप्रसाद सिटौला र जसपाकी एक मात्र सांसद निर्मला लिम्वु मन्त्रि बन्ने बताइएको छ।

मन्त्रिपरिषद्लाई पूर्णता भने विश्वासको मत लिएपछि मात्रै हुने नवनियुक्त मुख्यमन्त्री कार्कीले बताए। 

प्रदेश १ मा अहिले मुख्यमन्त्री तथा मन्त्रिपरिषद्को कार्यालय सहित १३ वटा मन्त्रालय छन्। १३ वटा मन्त्रालयको संख्या घटाएर ९ मा  झार्ने तयारी गरिएको छ।