प्रदेश १ : २८ पुसमा सभामुखको निर्वाचन

विराटनगर- प्रदेश १ को सभामुख चयनका लागि पुस २८ गते निर्वाचन हुने भएको छ। आइतबार  जेष्ठ सदस्य गयानन्द मण्डलको अध्यक्षतामा बसेको सर्वदलीय बैठकले सभामुखको पुस २८ र उपसभामुखको पुस ३० गते निर्वाचन गर्ने निर्णय गरेको एमाले प्रमुख सचेतक रेवतीरमण भण्डारीले जानकारी दिए।

उनका अनुसार मंगलबार बस्ने प्रदेशसभा बैठकले सभामुखको निर्वाचन कार्यतालिका सार्वजनिक गर्ने छ। उपसभामुखको निर्वाचन तालिका पुस २८ गते सार्वजनिक हुने भण्डारीले बताए।

सर्वदलीय बैठकले प्रदेशसभाको सोमबारको बैठक मंगलबारलाई सार्ने र सभामुखको अनुपस्थितमा बैठक सञ्चालनका लागि सबैदलबाट एक/एक जना सदस्य रहने निर्णय भएको प्रमुख सचेतक भण्डारीले बताए।

यसैबीच प्रदेश १ को मुख्यमन्त्रीमा एमाले संसदीय दलका नेता हिक्मत कार्कीले दावी पेश गरेका छन्। आइतबार दिउँसो ४ बजे प्रदेश प्रमुख पर्शुराम खापुङ समक्ष एमालेका कार्कीले दावी पेश गर्न लागेका हुन।

कार्कीले माओवादी, राप्रपा र जसपाको समर्थनमा दावी पेश गर्ने भएका हुन्।