रेसुंगा विमानस्थलमा परीक्षण उडान सफल

गुल्मीको रेसुंगा विमानस्थलमा तारा एयरले परीक्षण उडान गरेको छ। आज बिहान ११:१५ मा त्रिभुवन विमानस्थलबाट उडेको तारा एयरको नाईन एन एएलओ ट्वीनअटर–४०० विमान रेसुंगा नगरपालिका–१० स्थित सिमिचौरमा निर्माण भएको विमानस्थलमा १२ बजे अवतरण भएको हो।

तारा एयरले रेसुंगा नगरपालिकासँगको सहकार्यमा प्रमाणीकरण (प्रुभिङ) उडान सम्पन गरेको हो। तारा एयरका वरिष्ठ चालकद्वय क्याप्टेन सन्तोषकुमार साह र क्याप्टेन सन्जिव श्रेष्ठले उडान भरेका थिए।  जहाजमा गुल्मी जिल्लाबाट निर्वाचित सांसद चन्द्र भण्डारी, एमाले उपमहासचिव प्रदीप ज्ञवाली, प्रदेशसभा सदस्य धनेन्द्रबहादुर कार्की, नेकपा एकीकृत समाजवादीकी सचिव रामकुमारी झाँक्री, रेसुंगा नगरपालिकाका प्रमुख खिलध्वज पन्थीसहित तारा एयर र नेपाल नागरिक उड्डयन प्राधिकरणका अधिकारीहरु थिए। 

विमानलाई स्वागत गर्न विमानस्ठलमा स्थानीयको ठूलो भीड लागेको थियो। विमानस्थलमा नियमित उडानका लागि कम्तिमा २ देखि ३ साता लाग्नेछ।