यू–२० राष्ट्रिय महिला फुटबल टिमबाट ११ खेलाडी बाहिरिए

काठमाडौं- यू–२० राष्ट्रिय महिला टोलीको टोली ३० खेलाडीमा समेटिएको छ। यू–२० महिला टिमका मुख्य प्रशिक्षक यमप्रसाद गुरुङले शुक्रबार एन्फा कम्प्लेक्समा भएको ४१ तालिम गरिरहेका खेलाडीबाट ११ खेलाडीलाई हटाएका हुन्।

खुला छनोटबाट प्रशिक्षक गुरुङले ४१ खेलाडीलाई बन्द प्रशिक्षणको प्रारम्भिक टोलीमा बोलाएका थिए। त्यसपछि उनले पहिलो चरणमा ११ खेलाडी घटाएका हुन्। अब नेपाली टोलीले ढाकामा फेब्रुअरी ३ देखि ९, २०२३ सम्म हुने साफ यू–२० महिला च्याम्पियनसिपमा भाग लिनेछ। नेपालसँगै आयोजक बंगलादेश, भारत र भुटानको सहभागीता रहेको प्रतियोगिता लिग कम नकआउट शैलीमा हुनेछ।

राउन्ड रोबिनबाट शीर्ष दुई टिमले फाइनल खेल्नेछन्। प्रतियोगितामा नेपालले पहिलो दिन आयोजक टिमको सामना गर्नेछ। त्यस्तै तेस्रो दिन फेब्रुअरी ५ मा भुटान, फेब्रुअरी ७ मा भारतसँग खेल्नेछ। यसअघि नेपालले बंगलादेशमै भएको यू–१५ साफको उपाधि जितेको थियो।

बन्द प्रशिक्षणमा रहेको टोली
गोलकिपरः कविता विक, सावित्री किशन, लिला जोशी, पूजा थापा, सुजाता तामाङ

डिफेन्डरः सबिना चौधरी, सजनी थोकर, सरु हमाल, सुनिता भोलान, दिव्या यस्माली मगर, प्रतिक्षा चौधरी र गंगा रोकाया

मिडफिल्डरः कुमारी तामाङ, तुलसा बोहरा, सुष्मा जीटी, कुसुम खतिवडा, जेनिफर राणा, सारा बज्राचार्य, सुनकला राई, मनमाया दमाई, प्रीति राई, अञ्जली माछामासी, सरस्वती हमाल, हिमा रावत र दीपा शाही

फरवार्डः गरिमा राई, अमिषा कार्की, ममता पुन, अञ्जली चन्द र सदिपा भोलन