टी२० लिगको विवाद मिलाउन वार्तामा बसे राखेप र आईसीसीका प्रतिनिधि

काठमाडौं- नेपाल टी२० लिगमा देखिएको विवाद समाधान गर्न राष्ट्रिय खेलकुद परिषद् र आईसीसी जुटेका छन्। नेपाली खेलकुदको सर्वोच्च निकाय राखेप र विश्व क्रिकेटको सर्वोच्च निकाय आईसीसीका प्रतिनिधि वार्तामा बसेका हुन्।

त्रिपुरेश्वरमा राखेपका सदस्यसचिव टंकलाल घिसिङ र आईसीसीका सिनियर इन्भेस्टिगेटिभ अफिसर एन्ड्रयु इफग्रेभबीच बैठक बसेको हो।

राखेपले राजधानीमा जारी नेपाल टी२० लिग क्रिकेटमा देखिएको विवाद र घटनाक्रमबारे छानबिन गर्न समिति गठन गरेको छ। परिषद्को कार्यकारी समितिको बुधबार बसेको बैठकले परिषद्का कार्यकारी समिति सदस्य एकेन्द्रबहादुर कुँवरको संयोजकत्वमा ५ सदस्यीय छानबिन कार्यदल गठन गरेको हो। कार्यदलको सदस्यमा परिषद्का सदस्य प्रकाशकुमार कुसारी, खेलकुद पत्रकार निरञ्जन राजवंशी, खेलकुद विकास विभागका प्रशासकीय अधिकृत सरोजकुमार पोख्रेल र सचिवमा प्रशासन विभागका प्रशासकीय अधिकृत भोजानन्द राई रहेका छन्।