टी२० लिगबारे छानबिन गर्न राखेपद्वारा समिति गठन

काठमाडौं–  राष्ट्रिय खेलकुद परिषद् (राखेप) ले राजधानीमा जारी नेपाल टी२० लिग क्रिकेटमा देखिएको विवाद र घटनाक्रमबारे छानबिन गर्न समिति गठन गरेको छ।

परिषद्को कार्यकारी समितिको बुधबार बसेको बैठकले परिषद्का कार्यकारी समिति सदस्य एकेन्द्रबहादुर कुँवरको संयोजकत्वमा ५ सदस्यीय छानबिन कार्यदल गठन गरेको हो। कार्यदलको सदस्यमा परिषद्का सदस्य प्रकाशकुमार कुसारी, खेलकुद पत्रकार निरञ्जन राजवंशी, खेलकुद विकास विभागका प्रशासकीय अधिकृत सरोजकुमार पोख्रेल र सचिवमा प्रशासन विभागका प्रशासकीय अधिकृत भोजानन्द राई रहेका छन्।

राखेपले कार्यदललाई सत्यतथ्य छानबिन गरी १५ दिनभित्र परिषद्समक्ष प्रतिवेदन बुझाउन निर्देशन दिएको छ। विदेशी खेलाडीको श्रमस्वीकृति र प्रतियोगिता सञ्चालनको सम्बन्धमा परिषद्ले मागेको कागजात क्यानले उपलब्ध नगराएको विषयमा आफ्नो गम्भीर ध्यानाकर्षण भएको समेत राखेपले विज्ञप्तिमा जनाएको छ।