टी२० लिग: ९ ओभरको खेलमा काठमाडौंले विराटनगरलाई हरायो

काठमाडौं- नेपाल टी–ट्वान्टी लिगमा काठमाडौं नाइट्सले विराटनगर सुपर किंग्सलाई पराजित गरेको छ। विवादका कारण ढिला सुरु भएर ९ ओभरमा झारिएको खेलमा काठमाडौंले विराटनगरलाई ३४ रनले हराएको हो।

काठमाडौंले दिएको ९३ रनको लक्ष्य पछ्याएको विराटनगरले ८ ओभर ५ बलमा अलआउट हुँदै ५८ रन बनायो। विराटनगरका लागि गौरांशू शर्माले २२ रन बनाए। त्यस्तै विवेक यादवले १२ रन बनाउँदा नन्दन यादवले ११ रनको योगदान गरे। काठमाडौंका लागि कमल सिंह ऐरीले ३ विकेट लिए। त्यस्तै सुनाम गौतम र अनिल खरेलले समान २/२ विकेट लिए।

त्यसअघि पहिले ब्याटिङ गरेको काठमाडौंले ९ ओभरमा ५ विकेट गुमाएर ९२ रन बनाएको थियो। काठमाड‌ौंका लागि सन्दिप रजालीले अविजित ३२ रनको योगदान गरे। कमलसिंह ऐरीले १४ रन बनाउँदा कप्तान ज्ञानेन्द्र मल्लले १४ रनको योगदान गरे। विराटनगरका लागि नन्दन यादवले ३ विकेट लिए। हुसेन तलत र कियोन जोसेफले समान १/१ विकेट लिए।

जितसँगै काठमाडौं ७ खेलमा ४ जित र ३ हारको नतिजासहित ८ अंक जोडेर तेस्रो स्थानमा छ। पराजित विराटनगर ७ खेलमा ४ अंकसहित तालिकाको पाँचौं स्थानमा छ।