अलपत्र टी२० लिग: खेलाडीले खेल्न नमानेपछि टस हुन सकेन

काठमाडौं- नेपाल टी–२० लिगमा आज हुने भनिएको विराटनगर सुपर किंग्स र काठमाडौं नाइट्सको खेल अन्योलमा परेको छ।

खेलाडीहरूले आफूले पाउनुपर्ने पारिश्रमिक नपाएको भन्दै खेल्न नमानेपछि खेल अन्योलमा परेको हो। आज हुने खेलका लागि दुवै टिम मैदानमा पुगिसके पनि खेल्न नमानेपछि टस हुन नसकेको हो।

नेपाल क्रिकेट संघ (क्यान)ले भारतीय कम्पनी सेभेन थ्री स्पोर्ट्सलाई साझेदार बनाएर प्रतियोगिता गरेको हो। पटकपटक मिति सारेर मंसिर २८ देखि सुरु भएको नेपाल टी–२० लिगमा सोमबारसम्म ३४ मध्ये २० खेल सम्पन्न भइसकेका छन्।

तर, पछिल्लो समय आयोजक सेभेन थ्री स्पोर्ट्स कम्पनीका साझेदार नै सम्पर्कमा नआएको बताइएको छ। खेलाडी तथा अफिसियलले यसअघि नै सोमबारसम्म आफूले पाउनुपर्ने परिश्रमिक नपाए नखेल्ने बताएका थिए। केही विदेशी खेलाडीले नेपाल छाडिसकेका छन्।

नेपाल टी–२० लिगमा विराटनगर सुपर किंग्स, काठमाडौं नाइट्स, जनकपुर रोयल्स, लुम्बिनी अल स्टार्स, पोखरा एभेन्जर्स, र फार वेस्ट युनाइटेड गरी ६ फ्रेन्चाइज टोलीले प्रतिस्पर्धा गरिरहेका छन्।