रोनाल्डो रियादमा

रियाद- पोर्चुगिच फुटबल खेलाडी क्रिस्टियानो रोनाल्डो साउदी अरेबियाको रियाद पुगेका छन्। साउदी क्लब अल नासरले दुई वर्षका लागि अनुबन्ध गरेपछि उनी रियाद आएका हुन्।

अल नासरले ३७ वर्षे रोनाल्डोलाई आज औपचारिक रुपमा सार्वजनिक गर्ने जानकारी दिइएको छ। त्यसअघि रोनाल्डोको मेडिकल जाँच हुनेछ। अल नासरले विज्ञप्ति जारी गर्दै रोनाल्डो र क्लबबीच सन् २०२५ सम्मका लागि सम्झौता भएको बताएको छ। तर कति रकममा उनलाई भित्र्याइएको हो भन्नेबारे चाहिँ क्लबले खुलाएको छैन। रोनाल्डो २ सय मिलियन युरोभन्दा माथिको रकममा अल नासर गएको अन्तर्राष्ट्रिय सञ्चारमाध्यमले उल्लेख गरेका छन्।

पाँच पटकका बालोन डी ओर विजेता रोनाल्डो इंग्लिस प्रिमियर लिग क्लब म्यानचेस्टर युनाइटेडबाट अल नासर पुगेका हुन्। युनाइटेड र त्यसका प्रशिक्षक एरिक टेन हाखबारे आलोचनात्मक टिप्पणी गर्दै टेलिभिजनलाई अन्तर्वार्ता दिएपछि रोनाल्डो आलोचित बनेका थिए। त्यसपछि क्लब र रोनाल्डोबीच सहमतिमा सम्झौता भंग भएको थियो।