अन्तिम खेलमा नेपालले मलेसियासँग बराबरी खेल्यो

काठमाडौं-एएफसी यु-१६ महिला च्याम्पियनसिप छनोको अन्तिम खेलमा नेपालले मलेसियासँग ४-४ गोलका बराबरी खेलेको छ । हल्चोकस्थित एपीएफ क्लबको मैदान भएका खेलमा दुबै टोलीले बराबरी खेलेको हो  । 

नेपालका लागि कप्तान प्रिती राई, सुस्मा तामाङ र सबिता रानामगरले एक-एक गोल गरेका थिए भने एक गोल आत्मघाती उपहार पाएको थियो । मलेसियाको लागि हेल्मा इम्लीले २ गोल गर्दा नरुल नबिला र विटी तामिङले एक गोल गरिन् । 

यस्तै मलेसियाको लागि तामिङले नै आत्मघाती गोल गरेकी थिइन् । योसँगै छनोटको समूह ‘ई’ मा रहेको नेपालले १ अंक जोड्दा मलेसियाले पनि अन्तिम खेलमा आएर १ अंक जोडेको छ । 

अघिल्ला दुई खेलमा दुवै टोलीले पराजय बेहोरेका थिए । पहिलो खेलमा नेपाल फिलिपिन्ससँग ४-० ले पराजित भएको थियो । यस्तै दोस्रो खेलमा नेपाल म्यानमारसँग ११-१ ले पराजित भएको थियो । 
मलेसिया पहिलो खेलमा म्यानमार र दोस्रो खेलमा फिलिपिन्ससँग पराजित भएको थियो । यस छनोटबाट म्यानमारले दोस्रो चरणको छनोटमा स्थान बनाएको छ । समूह चरणको अन्तिम खेलमा आइतबार फिलिपिन्सलाई ५-१ ले हराएर म्यानमारले उपाधि जितेको हो । 

म्यानमारले ३ खेलबाट ९ अंक जोड्यो र म्यानमारले अपराजित रहदै दोस्रो चरणको छनोटमा स्थान बनाएको छ । यस्तै ३ खेलबाट ६ अंक जोडेको फिलिपिन्सले उपविजेता बन्यो ।  फिलिपिन्सको पनि उत्कृष्ट २ उपविजेता बन्दै दोस्रो चरणको यात्रा तय गर्ने सम्भावना छ ।