महान्यायाधिवक्ता पोखरेलले लिए सपथ

काठमाडौं– नवनियुक्त महान्यायाधिवक्ता डा. दिनमणि पोखरेलले पद तथा गोपनीयताको सपथ लिएका छन्। बिहीबार राष्ट्रपति भवनमा आयोजित समारोहमा राष्ट्रपति विद्यादेवी भण्डारी र प्रधानमन्त्री पुष्पकमल दाहाल ‘प्रचण्ड’को उपस्थितिमा कामु प्रधानन्यायाधीश हरिकृष्ण कार्कीले डा. पोखरेललाई सपथ गराएका हुन्।

प्रधानमन्त्री प्रचण्डको सिफारिसमा राष्ट्रपति भण्डारीले डा. पोखरेललाई बुधबार महान्यायाधिवक्तामा नियुक्त गरेकी थिइन्। २५ वर्षदेखि कानुन व्यवसायमा संलग्न पोखरेलले त्रिभुवन विश्वविद्यालयबाट कानुनमा विद्यावारिधि गरेका छन्। महान्यायाधिवक्ता पोखरेलले दिल्ली विश्वविद्यालयबाट तुलनात्मक कानुनमा स्नातकोत्तर, द हेग नेदरल्यान्ड्सको सामाजिक अध्ययन संस्थानबाट अन्तर्राष्ट्रिय राजनीतिक अर्थशास्त्र र विकासमा स्नातकोत्तरका साथै वातावरणीय कानुनमा स्नातक गरेका छन्।

कानुनी अभ्यास र परामर्शका अतिरिक्त डा. पोखरेलले कानुनी अनुसन्धान, कानुनी मस्यौदा र तालिममा संलग्न छन्। उनले संविधानसभाको प्राकृतिक स्रोत, आर्थिक अधिकार र राजस्व बाँडफाँट समितिमा कानुनविद्का रूपमा काम गरेका थिए। डा.पोखरेलले व्यवस्थापिका–संसद्को पूर्वसभामुख ओनसरी घर्तीको कानुनी सल्लाहकारको रूपमा काम गरेका थिए।