पाँचौ ढोरपाटन राष्ट्रिय भलिबल प्रतियोगिताको उपाधि एपिएफलाई

काठमाडौं-पाँचौ ढोरपाटन एम-१५० राष्ट्रिय खुला पुरुष भलिबल प्रतियोगिताको उपाधि एपीएफ क्लबले उचालेको छ । शनिबार भएको फाइनल खेलमा गण्डकी प्रदेशलाई ३-० को सोझो सेटमा हराउदै एपीएफले उपाधि उचालेको हो । 

एपीएफले गण्डकीलाई पहिलो सेटमा २५-१९ ले पराजित गर्दा दोस्रो सेटमा २५-१५ र तेस्रो सेटमा  २५-१७ ले पराजित गरेका थियो । उपाधिसँगै एपीएफले १ लाख नगद पुरस्कार प्राप्त गरेको छ । 

उपविजेता बनेको प्रदेश ४ ले ६० हजारमा चित्त बुझायो । तेस्रो भएको गिताञ्जली कलेजले ३५ हजार प्राप्त गर्यो । तेस्रो स्थानको लागि भएको खेलमा गिताञ्जलीले ढोरपाटन क्लबलाई २५-२८, ३०-२८ र २५-१५ को सेटमा हरायो ।

प्रतियोगितामा सर्वोकृष्ट खेलाडी एपीएफका महेन्द्र श्रेष्ठ घोषित भए । महेन्द्रले एक थान मोटरसाइकल प्राप्त गरे । 

व्यक्तिगत विधातर्फ उत्कृष्ट सर्भर गिताञ्जलीका दौलत सिंह, सेटर एपीएफका दिनेश गिरी, डिफेन्स प्रदेश ४ का राजन दर्लामी मगर, स्पाइकर एपीएफका टेकराज अवस्थी, ब्लकर प्रदेश ४ का हरी पाण्डे, क्वीकर एपीएफका बलिराम चौधरी र प्रशिक्षक एपीएफका ज्ञानेन्द्र विष्ट चुनिए । उत्कृष्ट हुनेले समान ५-५ हजार नगद प्राप्त गरे ।