पहिलो टी-२० मा हङकङको जित

काठमाडौं- बागमती प्रदेश आमन्त्रण महिला क्रिकेट श्रृङखलाअन्तर्गत पहिलो टी–२० खेलमा हङकङ क्रिकेट क्लबले मंगलबार आयोजक बागमती प्रदेशलाई ५७ रनले हराएको छ।

मूलपानी क्रिकेट मैदानमा टस हारेपछि पहिले ब्याटिङ गरेको भ्रमणकारी टोली हङकङले निर्धारित २० ओभरमा छ विकेटको क्षतिमा १६८ रनको प्रतिस्पर्धात्मक लक्ष्य प्रस्तुत गरेको थियो। बागमती प्रदेशले जवाफमा निर्धारित २० ओभरमा आठ विकेटको क्षतिमा १११ रन मात्र बनाउन सक्यो।

बागमतीका लागि विन्दा कट्वाल र खुशी डङ्गोलले सबभन्दा बढी १८–१८ रन बनाए। यसैगरी मेलिसा गुरुङले १७, सलिना सिलवालले १५ र अस्मिता खरेलले १५ रनको योगदान दिएका थिए। हङकङकी इमान चाइले दुई तथा कारेन पुमले एक विकेट लिए। घरेलु टिमका पाँच ब्याटर रनआउट भए।

प्लेयर अफ दि म्याचसमेत बनेकी लेमन छुङ्गे हङकङको पारीमा ३१ बल खेल्दै छ चौकासहित सर्वाधिक ४० रन बनाएर आउट भइन्। लेमन नै सर्वश्रेष्ठ खेलाडी घोषित भइन्। यसैगरी बेटी चानले २७ बलमा चार चौकासहित ३३ रनको महत्त्वपूर्ण पारी खेलिन्। ओपनिङ ब्याटरद्वय इमा चाइले १५ र केरी चानले २६ रनको योगदान गरे जहाँ बागमतीकी सोनी पाख्रिन र मेलिसाले दुई–दुई तथा अस्मिना कर्माचार्य र खुशीले एक–एक विकेट हात पारे।

यस नतिजासँगै दुई खेलको टी–२० शृंखलामा हङकङले अग्रता बनाएको छ। दोस्रो खेल बिहिबार हुनेछ। यसअघि बागमतीले ४० ओभरको दुई खेलको शृंखला क्लिन स्विप गरेको थियो।