मधेस प्रदेशमा निर्वाचित सबै प्रदेश सभा सदस्यलाई ल्यापटप

महोत्तरी- मधेस प्रदेशमा नवनिर्वाचित प्रदेश सभा सदस्यहरुलाई ल्यापटप वितरण गरिने भएको छ। प्रदेश सभामा निर्वाचित सांसदको शपथ ग्रहणको तयारी भइरहेको बेला प्रदेश सभा सचिवालयले सबैलाई ल्यापटप वितरण गर्ने तयारी गरेको हो।

ल्यापटप खरिदका लागि टेण्डर आह्वान गरिएको छ। खरिद प्रक्रिया पूरा भएपछि ल्यापटप वितरण गरिने सचिवालयका सचिव रञ्जित यादवले बताए। 

ल्यापटप वितरणका लागि टेण्डर आह्वान गरिएको र सम्पूर्ण प्रक्रिया पूरा गरेर ल्यापटप हस्तान्तरण गरिने उनले बताए।

यसअघि पनि प्रत्येक प्रदेश सभा सदस्यलाई ल्यापटप खरिद गरेर वितरण गरिएको थियो। त्यतिबेला सचिवालयले भ्याटबाहेक १ लाख १७ हजार ९७५ रुपैयाँ पर्ने डेल कम्पनीको ३३९० मोडेलको ‘टू इन वान, स्क्रिन टच’ ल्यापटप खरिद गरेको थियो।

प्रदेश सभा सदस्यलाई शपथ ग्रहण गरेसँगै प्रदेश सभाको लोगो र एक थान ल्यापटप दिने सचिवालयको तयारी छ।