प्रदेश १ : एमालेले आज संसदीय दलको नेता छान्ने

विराटनगर- प्रदेश १ सभाको ठूलो दल नेकपा एमालेले आज संसदीय दलको नेता चयन गर्दै छ। 

संसदीय दलको नेता छान्नका लागि एमालेले आइतवार बैठक बोलाएको छ। दिउँसो १ बजे एमाले संसदीय दलको कार्यालयमा बैठक बोलाइएको एमाले सांसद बुद्धिकुमार राजभण्डारीले बताए।

एमालेमा दलको नेता स्थायी कमिटी सदस्यसमेत रहेका हिक्मतकुमार कार्की हुने करिव निश्चित छ। सर्वसम्मत रुपमा कार्की नेतामा चयन हुने सांसदले बताए। कार्की पूर्वआन्तरिक मामिला तथा कानुनमन्त्री मसेत हुन्। उनी झापा क्षेत्र नम्बर ५ (क) बाट निर्वाचित भएका हुन्। एमालेले सपथग्रहण अघि नै दलको नेता चयन गर्ने भएको हो। नवनिर्वाचित प्रदेश सभा सदस्यको शपथग्रहण सोमवार हुँदै छ। 

प्रदेश १ संसदको सबैभन्दा ठूलो दल एमालेका ४० सांसद छन्। प्रदेश १ मा एमालेले प्रत्यक्षतर्फ २५ जना र समानुपातिकतर्फ १५ जना सांसद जितेको थियो। 

प्रदेशसभामा प्रतिनिधित्व गर्ने ६ राजनीतिक दलहरु मध्ये एमालेले सपथग्रहण अगावै दलको नेता छान्ने भएको छ। संसदको दोश्रो ठूलो दल नेपाली कांग्रेसले पुस १५ गते नेता छान्ने जनाएको छ।