टी-२० लिगमा आज दुई खेल : पहिलो खेलमा विराटनगर र लुम्बिनी भिड्दै

काठमाडौं- काठमाडौंमा जारी नेपाल टी-२० लिगमा आज दुई खेल हुँदैछन्। कीर्तिपुरको त्रिवी क्रिकेट मैदानमा शनिबारबाट सुरु भएको लिगको दोस्रो दिन दुई खेल हुँदैछन्।

बिहान ९:१५ मा सुरु हुने खेलमा विराटनगर सुपर किंग्सले लुम्बिनी अल स्टारको सामना गर्दैछ। प्रतियोगितामा विराटनगरको पहिलो खेल हो भने लुम्बिनीले यसअघि नै एक खेल खेलिसकेको छ।

यसअघि कीर्तिपुरस्थित त्रिवी मैदानमा शनिबार दिउँसो सम्पन्न दोस्रो खेलमा लुम्बिनीले फारवेस्ट युनाइटेडलाई ६७ रनले हराएको थियो। 

टस जितेर पहिलो ब्याटिङ गरेको लुम्बिनीले पुरा ओभर खेल्दै सात विकेट गुमाएर १५२ रन बनाएको थियो। जवाफमा १६ ओभर दुई बलमै सबै सम्पूर्ण विकेट गुमाएर ८५ रन बनाएपछि अलस्टारले ६७ रनको जित निकालेको हो। 

यससँगै लुम्बिनीले लिगमा दुई अंक जोडिसकेको छ। त्यस्तै लिगको दोस्रो खेल भने दिउँसो १:१५ बजे सुरु हुनेछ। यो खेलमा जनकपुर रोयल्सले पोखरा एभेन्जर्सको सामना गर्दैछ। पोखराले पनि आफ्नो पहिलो खेलमा जित निकालेको थियो। यता जनकपुरले भने लिगमा आज पहिलो खेल खेल्दैछ।