च्याम्पियन्स लिग : रोनाल्डोलाई एक खेल मात्र प्रतिबन्ध हुने सम्भावना 

टुरिन (एजेनसी)-च्याम्पियन्स लिगअन्तर्गत बुधबार भ्यालेन्सियाविरुद्ध भएको खेलमा युभेन्ट्सका स्टार खेलाडी क्रिस्टियानो रोनाल्डो रातो कार्ड मैदान बाहिरिएका थिए । 
उनले खेलको २९ औं मिनेटमा भ्यालेन्सियाका डिफेन्डर जेसन मुरील्लोको कपाल तानेको आरोपमा रेफ्रिले रातो कार्ड देखाएका थिए । युरोपेली फुटबलको सर्वोच्च निकाय यूईएफएले रोनाल्डोलाई दिएको रातो कार्डको छानविन थाल्दैछ । 

रातो कार्ड पाएपछि रोनाल्डो भावुक हुँदै मैदान छाडेका थिए । यदि उनलाई एक खेल प्रतिबन्ध लगाएको खण्डमा उनले योङ्ग ब्वाइजविरुद्धको खे गुमाउने छन् । उनले एक खेलको प्रतिबन्धमाथि भने यूईएफएमा अपिल गर्न पाउने छैनन् । 

तर दुई वा सो भन्दा बढी खेल प्रतिबन्ध लागेमा उनले अपिल गर्न पाउने प्रावधान छ । सोहि कारण उनलाई २ देखि ३ खेल प्रतिबन्ध हुनसक्ने सम्भावना थियो । तर, अहिले उनलाई एक खेल मात्र प्रतिबन्ध हुने सम्भावना बढेको छ । 

यद्यपी यूईएफए स्रोतका अनुसार रोनाल्डोलाई न्यूनतम १ खेलको प्रतिबन्ध लाग्ने भएको छ । यदि रोनाल्डोलाई ३ खेल प्रतिबन्ध भए म्यानचेस्टर युनाइटेडविरुद्ध अवे मैदानमा अक्टोबर २३ र घरेलु मैदानमा नोभेम्बर ७ मा हुने खेल गुमाउने थिए ।

रोनाल्डोले रातो कार्ड पाएपनि उनले म्यानचेस्टर युनाइटेडविरुद्ध भने खेल्न पाउने अपेक्षा धेरैले गरेका छन् । युनाइटेडका पूर्व मिडफिल्डर ड्यारेन फेल्चारले भने, ‘रातो कार्ड निकै फितलो निर्णय थियो । खेलको नियम पढ्ने हो भने त्यो हर्कत गलत नै हो तर त्यसको लागि एक खेल भन्दा बढी प्रतिबन्ध लगाउनु पर्दैन । उनले युनाइटेडविरुद्ध दुवै खेलमा खेल्ने अपेक्षा गरेको छु ।’