सुन्दरबजार नगरपालिकामा कोसेली घर बन्दै

लमजुङ- लमजुङको सुन्दरबजार नगरपालिकाले सुन्दरबजार नगरपालिका–६ ठाँचीचौरस्थित प्रशासकीय भवनमा कोसेली घर निर्माण गरिरहेको छ। 

स्थानीय उत्पादनको प्रवर्द्धन तथा बजारीकरण गर्ने र पर्यटक आकर्षित गर्ने उद्देश्यले नगरपालिकाले १५ लाख लगानीमा कोसेली घर निर्माण सुरू गरेको नगर प्रमुख कृष्णप्रसाद कोइरालाले बताए। उनले भने, ‘पालिकाभित्रका वासिन्दाले उत्पादन गरेका सामग्री राख्नका लागि कोसेली घर निर्माणलाई तीव्रता दिएका छौं।’

परम्परागत शैलीमा गोलाकारका २ तलाका कोसेली घर निर्माण भइरहेका उनको भनाइ छ। गत जेठबाट सुरू भएको कोसेली घरको निर्माण अन्तिम चरणमा पुगेको छ। कोसेली घरको माथिल्लो तल्लामा संग्रहालय हुनेछ। 

कोसेली घरमा स्थानीय स्तरमा उत्पादित जैविक मह, भटमास, कोदो, गुन्द्रुक, रक्सी, कागुनु, आलु, फापर लगायत अन्य तरकारी, हातले बुनेका सामग्री समेत राखिने छ। यहाँ राखिएका सामग्री अवलोकन तथा खरिद गर्न सकिनेछ।