तेस्रो पटक पनि सर्ने भयो नेपाल टी–२० लिग, नयाँ मिति अनिश्चित

काठमाडौं– आयोजकले आयोजना गर्न नसकेपछि पटक पटक सर्दै आएको नेपाल टी २० लिग फेरि सर्ने भएको छ। नेपाल क्रिकेट संघ (क्यान) ले पहिलो पटक आयोजना गर्न लागेको नेपाल टी–२० लिगको तयारी नपुगेपछि तेस्रो पटक पनि सर्ने अवस्थामा पुगेको हो।

सुरुमा यो लिग दशैंअघि असोज आठ गतेबाट आयोजना गर्ने क्यानको लक्ष्य थियो। त्यसैले क्यानले नवौं राष्ट्रिय खेलकुद पछि सारेको थियो। तर त्यसपछि पनि दुई पटक मिति सरिसकेको छ।

सुरुमा मंसिर २५ गतेलाई सरेको प्रतियोगिता पछिल्लो समय पुस आठ गते पुगेको थियो। यसबीचमा काठमाडौं गोर्खाजले आफ्नो नाम पनि फिर्ता लिइसकेको छ। त्यसको नाम अर्कै कम्पनीले किनेको क्यानले जानकारी दिएको छ।

पछिल्लो पटक क्यानले पुस आठ गतेबाट लिग गर्ने गरी सूचना जारी गरेको थियो। तर क्यानले र कमर्सियल पार्टनर सेभेन थ्रि स्पोर्टस्ले तयारी चुस्त नगरेपछि प्रतियोगिता फेरि सर्ने निश्चित भएको हो। तर अहिलेम्म क्यानले नयाँ मिति तोकेको छैन। यद्यपि क्लबहरुले प्रतियोगिता खेल्ने टिम भने घोषणा गर्ने क्रम चलिरहेको छ। जनकपुर, विराटनर, लुम्बिनी र पोखराले टिम घोषणा गरिसकेका छन्। त्यसैले प्रतियोगिता एक दुई दिन सर्न सक्ने भएको छ।

प्रतियोगितामा काठमाडौं नाइट्स, पोखरा एभेन्जर्स, विराटनगर सुपर किंग्स, लुम्बिनी अल स्टार्स, जनकपुर रोयल्स र फार वेस्टर्न युनाइटेड छन्। प्रतियोगिताको लागि यि सबै क्लबका विदेशी खेलाडी नेपाल आइसकेका छन्। तर उनीहरुले अहिलेसम्म श्रम स्विकृति पाएका छैनन्। अहिले ३० विदेशी खलाडीको श्रम स्विकृति प्रकृयामा नै छ। उनीहरुले स्वीकृति नपाए नेपालमा खेल्न पाउने छैनन्।

यो मितिमा पनि प्रतियोगिता आयोजना हुन नसके सञ्चालन अधिकार पाएको कम्पनीसँग सम्झौता रद्द्द गरी क्यान आफैंले प्रतियोगिता आयोजना गर्ने अवस्थामा क्यान पुगेको छ। त्यसो त क्लब आफैंले प्रतियोगितामा समावेश खेलाडीको श्रम स्विकृति लिनुपर्ने हो। क्लब नेपालमा दर्ता नै भएका छैनन्। त्यसैले खेलाडीलाई क्यानले नै दर्ता गर्नुपर्ने भएको छ।