एपीएफ र आयोजक ढोरपाटन क्लब सेमिफाइनलमा प्रवेश

काठमाडौं-विभागीय टोली नेपाल एपीएफ क्लब र आयोजक ढोरपाटन क्लब पाँचौ ढोरपाटन एम-१५० राष्ट्रिय खुला पुरुष भलिबल प्रतियोगिताको सेमिफाइनलमा प्रवेश गरेका छन् ।

एपीएफले मन्डली स्पोर्टस् क्लब पाल्पालाई ३-० को सेटमा पराजित गर्दै सेमिफाइनलमा पुग्न सफल भएको हो । नयाँ बसपार्कस्थित ढोरपाटन क्लबको खेल मैदानमा बिहिबार भएको खेलमा एपीएफले पहिलो सेट २५-२० ले आफ्नो पक्षमा पारेको थियो । 

दोस्रो र तेस्रो सेट २५-१५ र २५-१६ ले आफ्नो पक्षमा पार्न सफल भयो । बिहिबारै भएको प्रतिस्पर्धात्मक खेलमा आयोजक ढोरपाटनले थ्री स्टार एकेडेमीमाथि ३-२ को प्रतिस्पर्धात्मक सेटमा जित निकाल्दै सेमिफाइनलमा पुग्न सफल भयो । 

पहिलो सेट २५-२२ ले जितेको ढोरपाटनले दोस्रो सेट ३२-३० ले आफ्नो पक्षमा पारेको थियो । त्यसपछि लगातार दुई सेट गुमाएको ढोरपाटनले अन्तिम सेट आफ्नो पक्षमा पार्दै सेमिफाइनलमा स्थान सुरक्षित गरेको हो । 

थ्री स्टारले तेस्रो र चौथो सेट २५-१८ र २५-१५ ले जितेपछि अन्तिम सेटको नतिजा कुर्नुपरेको थियो । तर अन्तिममा ढोरपाटन १५-१३ ले विजयी हुन सफल भयो । 
यस्तै गिताञ्जली कलेजले बुढानिलकण्ठलाई ३० कै सेटमा पराजित गर्‍यो । 

पहिलो सेट २८-२६ ले जितेको गिताञ्जलीले दोस्रो र तेस्रो सेट २५-१४ र २५-२३ ले आफ्नो पक्षमा पारेको थियो ।