क्लबविहीन रोनाल्डो साउदी क्लबमा अनुबन्ध हुँदै

काठमाडौं– पोर्चुगिज फुटबल स्टार क्रिष्टियानो रोनाल्डो साउदी अरेबियाको क्लब अल नसरमा आबद्ध हुने भएका छन्। बेलायती मिडिया डेली मेलका अनुसार उनी यस वर्षको अन्तिममा अल नसरमा जान लागेका हुन्।

रोनाल्डोले वार्षिक १७५ मिलियन पाउन्डमा साउदी क्लबसँग सम्झौता गर्न लागेको डेली मेलले उल्लेख गरेको छ। ३७ वर्षीय रोनाल्डोले म्यानचेस्टर युनाइटेडसँग यसै महिनाको सुरुवातमा सम्झौता अन्त्य गरेका थिए। एक अन्तर्वार्तामा क्लब र प्रशिक्षकको बारेमा तिखो टिप्पणी गरेपछि उनी विवादमा पनि तानिएका थिए। उनले सोही कारण क्लब छोड्नुपरेको थियो। रोनाल्डो अहिले क्लबविहीन छन्।

अल नासरले यसै वर्षको अन्तमा रोनाल्डोसँग सम्झौता गर्ने तयारी गरेको छ। अहिले रोनाल्डो परिवारसहित दुबईमा छन्।