ट्रकमा मोटरसाइकल ठोक्किँदा बारामा दुई जनाको मृत्यु

काठमाडौं- बाराको निजगढ नगरपालिका–२ मा ट्रकमा मोटरसाइकल ठोक्किँदा दुईजनाको मृत्यु भएको छ। एकजना घाइते छन्।

मोटरसाइकल चालक रौतहटको गुजरा नगरपालिका सिम्रिकका २६ वर्षीय भुवन पहाडी र त्यसमै पछाडि सवार २७ वर्षीय रितबहादुर राईको मृत्यु भएको हो। उनीहरू दुवैको घटनास्थलमै मृत्यु भएको जनाइएको छ।

सोही दुर्घटनामा मोटरसाइकलमा पछाडि सवार २४ वर्षीय सुशील माझी घाइते भएका छन्। उनको निजगढस्थित प्रसूति सामुदायिक अस्पतालमा उपचार भइरहेको छ।

हिजो बेलुका करिब ७ बजे प्रदेश २ ०२ ००९ प ३९४३ नम्बरको मोटरसाइकल अनियन्त्रित भई सडकछेउमा रोकिराखेको प्रदेश २ ०३ ००१ ख ४२२९ नम्बरको ट्रकमा ठोक्किएको थियो। दुवै सवारीसाधन र ट्रक चालकलाई नियन्त्रणमा लिइएको इलाका प्रहरी कार्यालय निजगढले जनाएको छ।