सवारी दुर्घटनामा लिखु तामाकोशी-१ दुरागाउँका वडा सदस्य सुनुवारको निधन

काठमाडौं- सवारी दुर्घटनामा रामेछापको लिखु तामाकोशी-१ दुरागाउँका वडा सदस्य विमल सुनुवारको निधन भएको छ। 

शनिबार दिउँसो भुजीमा भएको बोलेरो दुर्घटनामा घाइते ३९ वर्षीय सुनुवारको वीरेन्द्र अस्पताल, छाउनीमा उपचारको क्रममा गएराति निधन भएको प्रहरीले जनाएको छ।

सुनुवारको आज पशुपति आर्यघाटमा दाहसंस्कार हुने वडाअध्यक्ष पारिवारिक स्रोतले बताएको छ। सुनुवार एमालेबाट निर्वाचित वडा सदस्य हुन्।

जिल्ला प्रहरी कार्यालय रामेछापका अनुसार उमाकुण्ड लिग फुटबल हेर्न दुरागाउँबाट भुजी जाँदै गरेका यात्रु सवार बा ११ च ७५९१ नम्बरको बोलेरो भुजीको एकतारे छाँगामा दुर्घटना हुँदा ९ जना घाइते भएका थिए। 

दुर्घटनामा परी लिखुतामाकोशी गाउँपालिका-१ कोटगाउँकी ३२ वर्षीया बिमला सुनुवार, २३ वर्षीया श्रृष्टी सुनुवार, ३४ वर्षीय राजकुमार थापा, ३० वर्षीया सीता कार्की, ३० वर्षीया मनिता खड्का, १६ वर्षीय नरेश खड्का, ४० वर्षीय दिपक सुनुवार र १९ वर्षीय सुजन भुजेलसमेत घाइते भएका हुन्। 

दुर्घटनामा गम्भीर घाइते भएका विमलसँगै बिमला, राजकुमारलाई पनि थप उपचारका लागि हेलिकोप्टरमा काठमाडौंमा ल्याइएको थियो। उनीहरूको नेपाल-भारतमैत्री अस्पताल र  ट्रमा सेन्टरमा उपचार भइरहेको छ।