फागुनसम्म रोकियो कर्मचारीको सरुवा, पदस्थापन

काठमाडौं– सरकारले राष्ट्रसेवक कर्मचारी बढुवाका लागि मात्रै दुर्गम क्षेत्रमा धाउन थालेपछि खरिदारसरहका कर्मचारीको सरुवा तथा पदस्थापन  फागुन मसान्तसम्मका लागि स्थगित गरेको छ।

लामो समयदेखि सुगम स्थानमा रहेर काम गरिरहेका तर कर्मचारी बढुवा प्रयोजनका लागि मात्र दुर्गम स्थानका निकायमा सरुवा भई जाने क्रम बढेपछि फागुन मसान्तसम्म खरिदार कर्मचारीको सरुवा तथा पदस्थापन रोकिएको संघीय मामिला तथा सामान्य प्रशासन मन्त्रालयले बताएको हो। 

हाल लोकसेवा आयोगको वार्षिक कार्यतालिकाबमोजिम रापत्र अनंकित खरिदार वा सोसरहका पदमा विज्ञापन प्रकाशित हुने (खुला प्रतिस्पर्धा तथा बढुवा) समय हो। यसरी बढुवा सूचना प्रकाशित हुनुभन्दा अगाडि सरुवा गरी पठाउँदा लामो समयदेखि दुर्गम स्थानमा बसेर सेवा गरिआएका कर्मचारी बढुवा प्रयोजनमा नपर्ने भन्दै विभिन्न सरोकारवाला पक्षबाट गुनासो आएको मन्त्रालयले जनाएको छ।

राजपत्र अनंकित द्वितीय श्रेणी, खरिदार वा सोसरहका पदको कुनै पनि निकायमा सरुवा वा पदस्थापन गर्ने तथा सरुवा सहमति दिने काम फागुन मसान्तसम्मका लागि स्थगित गरेको मन्त्रालयले जनाएको छ।