जुम्ली गाउँमा बालविवाह र छाउपडीविरुद्ध सचेतना

जुम्ला– सामाजिक विकृतिका रुपमा रहेको बालविवाह र छाउपडी प्रथाविरुद्ध ‘आत्मसम्मानका लागि सहकार्य क्याड नेपाल जुम्ला’ले सचेतना कार्यक्रम सञ्चालन गर्दै आएको छ। 

प्लान इन्टरनेसनल नेपालको आर्थिक सहयोगमा संस्थाले बालविवाह, अपांगता भएकाहरुको हकाधिकार र छाउपडी प्रथाविरुद्धका क्षेत्रमा काम गरिरहेको छ। बालविवाह न्यूनीकरणका लागि पालिका स्तरमा रणनीतिक योजना निमार्णमा संस्थाले महत्त्वपूर्ण भूमिका निर्वाह गरेको संयोजक गिरीराज अधिकारीको दाबी छ।

‘हिमा गाउँपालिकामा महिला सन्जाल, सिञ्जामा अपांगता सन्जाल र कनकासुन्दरी गाउँपालिकामा दलित समूहसँगको समन्वयमा घरेलु हिंसा, बालविवाह, छाउपडीविरुद्ध सचेतनाका कार्यक्रम सञ्चालन भइरहेको छ’, उनले भने। 

सुरक्षित विद्यालय, यौन तथा प्रजनन स्वास्थ्यसम्बन्धी चेतना, युवा, महिला, बालबालिकालाई स्थानीय स्तरमा रोजगारका अवसर एवं परिवर्तनका संवाहकमार्फत सामाजिक विकृति हटाउने प्रयास भइरहेको उनको दाबी छ।–रासस