झापामा ८४ जनाले बुझाए चुनावी खर्च विवरण

झापा– झापाबाट प्रतिनिधिसभा र प्रदेशसभामा  उम्मेदवार बनेका १९२ मध्ये ८४ उम्मेदवारले मात्रै आफ्नो चुनावी खर्च विवरण बुझाएका छन्।जिल्ला निर्वाचन कार्यालयका अनुसार हालसम्म चुनावी खर्च विवरण बुझाउनेमा क्षेत्र ५ बाट प्रतिनिधिसभा सदस्यमा उम्मेदवार बनेर विजयी भएका एमाले अध्यक्ष केपी ओेलीसहित विभिन्न राजनीतिक दल र स्वतन्त्र गरी ८४ जनाले खर्च विवरण बुझाएका हुन्।

ठूला दलबाट निर्वाचन खर्च बुझाउनेमा हालसम्म अध्यक्ष ओली मात्र रहेको निर्वाचन कार्यालयका नासु प्रेम गुरागाईंले बताए। उनले अध्यक्ष ओलीले प्रचार सामग्री छपाइ, यातायात, खाजा, खाना, सम्पर्क कार्यालय स्थापना गायतको शीर्षकमा १८ लाख ८२ हजार चुनावी खर्च भएको विवरण कार्यालयमा बुझाएको जानकारी दिए। निर्वाचन परिणाम घोषणा भएको ३५ दिनभित्र उम्मेदवारले आफ्नो खर्च विवरण बुझाइसक्नुपर्ने प्रावधान रहे पनि विवरण बुझाउन विलम्ब गरिरहेको उनको भनाइ छ। 

उनले नेपाल मजुर किसान पार्टी(नेमाकिपा)का प्रतिनिधिसभा सदस्यका लागि उम्मेदवार बनेका कृष्ण गोपाल, महेन्द्र खायामलीलगायतले भने चुनावी खर्च शून्य भएको विवरण बुझाएको जानकारी दिए।–रासस