कर्मयोगी बद्री पहाडी समाजसेवा पुरस्कारबाट विनोद पहाडी पुरस्कृत

बुटवल- मानवअधिकार तथा शान्ति समाजले ‘कर्मयोगी बद्री पहाडी समाजसेवा पुरस्कार–२०७८’ विनोद पहाडीलाई प्रदान गरेको छ।

अन्तराष्ट्रिय मानव अधिकार दिवसको सन्दर्भमा आइतबार बुटवलमा एक कार्यक्रमका बीच पहाडीलाई एक लाख १० हजार रूपैयाँ पुरस्कार राशी, दोसल्ला र सम्मानपत्र सहित पुरस्कृत गरिएको हो। पुरस्कृत पहाडीलाई लुम्बिनी प्रदेश प्रमुख अमिक शेरचन र मानव अधिकारवादी नेता कृष्ण पहाडीले पुरस्कृत गरे।

लुम्बिनीका प्रदेश प्रमुख शेरचनले देशको प्रमुख समस्या भ्रष्टाचार भएकाले त्यसको नियन्त्रण साझा एजेन्डा बन्नुपर्ने बताए। उनले व्यक्ति हत्या भन्दा खतरनाक भ्रष्टाचारी हुने बताउँदै आजीवन कारागारको व्यवस्था हुनुपर्ने बताए। उनले मुलुक बनाउनेहरुले भ्रष्टाचार पूर्ण रुपमा नियन्त्रण गर्नुपर्ने बताउँदै नागरिक समाजले खबरदारी गर्नुपर्नेमा जोड दिए।

कार्यक्रममा मानव अधिकार तथा शान्ति समाजका संस्थापक सभापति कृष्ण पहाडीले अझै पनि नेपालका राजनीतिक दलहरु कर्मकाण्डी बनेको बताए। उनले समाज रुपान्तण हुन नसकेको बताउँदै समाजमा रहेको जातीय भेदभाव, हिंसा अन्त्य नहुँदासम्म लोकतन्त्र समुन्नत हुन नसक्ने बताए। 

पुरस्कृत भएपछि बोल्दै पहाडीले यो पुरस्कार सिंगो दलित आन्दोलनप्रतिको सम्मान भएको बताए। उनले आफूले यो पुरस्कारको रकम निजी काममा खर्च नगर्ने भन्दै पुरस्कार अक्षयकोषको स्थापनाका लागि प्रयोग गर्ने घोषणा गरे। कार्यक्रममा मानव अधिकार तथा शान्ति समाजका केन्द्रीय सभापति गोविन्द खनालले शान्ति समाजले कर्मयोगी बद्री पहाडी समाजसेवा पुरस्कार समाजमा विशिष्ट योगदान पुर्‍याएको व्यक्तिलाई गर्ने गरिएको बताए।

संविधानसभा सदस्य (२०६४) समेत रहेका अधिकारकर्मी एवं सञ्चारकर्मी पहाडीले तीन दशकदेखि सामाजिक न्यायको क्षेत्रमा गरेको योगदानको कदर गर्दै समाजले पुरस्कृत गरेको हो। कार्यक्रममा तिलोत्तमा नगरपालिका प्रमुख रामकृष्ण खाण, पत्रकार डा. बालकृष्ण चापागाई, शान्ति समाजका सल्लाहकार उत्तम पुडासैनी, वरिष्ठ उपसभापति सुशील बस्नेत, महासचिव रामकृष्ण बराल, पत्रकार महासंघ रूपन्देही सभापति रामराज पोखरेल, अधिकारकर्मी रिमा बिसी, रूपन्देही शाखा सभापति खिमप्रसाद भट्टराई (कृष्ण) लगायत वक्ताहरुले मन्तव्य व्यक्त गरेका थिए।