ब्राजिलका राष्ट्रिय फुटबल टोलीका मुख्य प्रशिक्षकले दिए राजीनामा

काठमाडौं- ब्राजिलका राष्ट्रिय फुटबल टोलीका मुख्य प्रशिक्षक टिटेले पदबाट राजीनामा दिएका छन्। ब्राजिल कतार विश्वकपको क्वार्टरफाइनलबाटै बाहिरिएपछि मुख्य प्रशिक्षक टिटेले पदबाट राजीनामा दिएका हुन्।

शुक्रबार राति दोहाको एजुकेसन सिटी रंगशालामा भएको खेलमा पाँच पटकको विजेता ब्राजिललाई क्रोएसियाले पेनाल्टी सुटआउटमा ४–२ गोलले पराजित गरेको थियो। त्यसपछि मुख्य प्रशिक्षक टिटेको राजीनामा आएको हो।

‘म शान्ति चाहन्छु। त्यसैले प्रशिक्षकको जिम्मेवारीबाट अलग्गिएँ। प्रतियोगिता अघि मैले आफ्नो परवाह गरिनँ। टोलीकै बारेमा सोचें। यो मेरा लागि दर्दनाक हार हो,'  ६१ वर्षीय टिटेले भनेका छन्।

टिटे सन् २०१६ मा ब्राजिलको मुख्य प्रशिक्षक नियुक्त भएका थिए। डुंगाले छाडेपछि उनी ब्राजिलको मुख्य प्रशिक्षक नियुक्त भएका थिए। टिटेको नेतृत्वमा ब्राजिलले सन् २०१९ मा कोपा अमेरिका जितेको थियो। टिटेले ब्राजिललाई ८१ खेलमध्ये ६० खेलमा जित दिलाएका छन्। जसमा ब्राजिलले सात खेलमा मात्र हार बेहोरेको थियो। 

टिटेले आफू केही समय फुटबलबाट टाढा बस्न चाहेको बताउँदै खेलमा जित र हार एउटा चक्र भएको बताएका छन्।