थापाथलीको सुकुम्बासी बस्ती हटाउन माग गर्दै प्रदर्शन

काठमाडौं– थापाथलीस्थित बागमती नदी किनार कब्जा गरेर घरटहरा बनाएका नक्कली सुकुम्बासी बस्ती हटाउन माग गर्दै महानगर परिसरमा प्रदर्शन गरिएको छ।

मंगलबार उपत्यकावासी व्यवस्थापन तथा सहयोग संघर्ष समितिले नक्कली सुकुम्बासीले थापाथलीमा जमिन कब्जा गरी घरटहरा बनाएको दाबी गर्र्दै छानबिन गरी कारबाही गर्न माग गरेको हो।

समितिले महानगरका मेयर बालेन्द्र साहलाई ध्यानाकर्षण–पत्र बुझाएको छ । ध्यानाकर्षण–पत्रमा भनिएको छ, ‘कथित सुकुम्बासीका घरटहरा हटाई, राजधानीको सौन्दर्य, शान्ति र मैत्रीपूर्ण वातावरण सिर्जना गर्न महानगर पछि नहटोस्।’

समितिले सुकुम्बासी बस्तीमा दिउँसै घरेलु हतियारसहित नगर प्रहरी, महानगर प्रमुखलाई धम्की दिनुले उपत्यकामा त्रास फैलिएको बताएको छ। केही दिनअघि महानगरले थापाथलीस्थित बागमती नदी किनारमा अवैध कब्जा गरी बनाइएका घरटहरा हटाउन खोज्दा सुकुम्बासीले प्रतिकार गरेका थिए।