नेपाल–भारत सीमामा ढुंगा हानाहान

काठमाडौं– दार्चुलास्थित नेपाल–भारत सीमामा तनाव भएको छ। भारतीय नागरिकले नेपाली नागरिकमाथि ढुंगा प्रहार गरेको बताइएको छ।

जिल्ला प्रहरी कार्यालय दार्चुलाका अनुसार ४ जना नेपाली घाइते भएका छन्। त्यसको विरोधमा नेपाल–भारत जोड्ने महाकाली नदीमाथिको पुलमा आवतजावत बन्द गरिएको छ।

भारतले महाकाली नदीको धार परिवर्तन हुने गरी निर्माण गरिरहेको तटबन्धको विरोध गरिरहेका नेपाली नागरिकमाथि दार्चुला पारि भारतको धार्चुलाबाट ढुंगा प्रहार भएको हो। दुवैतर्फबाट ढुंगा हानाहान भएको बताइएको छ।

आइतबार करिब ४ बजेतिर घटना भएको र केही व्यक्ति घाइते भएको सूचनापछि टोली त्यता पठाएको जिल्ला प्रहरी कार्यालय दार्चुलाले जनाएको छ। महाकाली नदीमाथिको पुलले नेपालको दार्चुला र भारतको धार्चुला जोड्छ।

भारतले पछिल्ला दिनमा तटबन्ध निर्माणलाई तिव्रता दिएको छ। नदीको धार परिवर्तन हुने गरी निर्माण भइरहेको तटबन्धले सदरमुकाम खलंगा जोखिममा पर्न सक्ने भन्दै स्थानीय आक्रोशित छन्।