थापाथलीको सुकुम्बासी बस्ती पस्यो महानगरको डोजर, स्थानीयले गरे ढुंगामुढा

काठमाडौं– थापाथलीस्थित बागमती किनारमा रहेको सुकुम्बासी बस्ती हटाउन काठमाडौं महानगरले डोजर चलाएको छ। अतिक्रमित सुकुम्बासी बस्ती हटाउन गएको महानगरको टोलीमाथि स्थानीयले ढुंगामुढा गरेपछि उक्त क्षेत्र तनावग्रस्त बनेको छ।

एकीकृत बागमती सभ्यता विकास समितिले ४ मंसिरसम्म अन्तिम म्याद राखेर बस्ती खाली गर्न सूचना जारी गरिसकेको छ। समितिले नदी किनारमा अनधिकृत रूपमा निर्माण भएका घरटहरा तथा निर्माण सामग्री र सवारी साधन हटाउन सूचना जारी गरेको थियो।

अनधिकृत रूपमा बागमती नदी किनारमा कब्जा जमाएर बसेको समूहले वैकल्पिक व्यवस्थाबिनै हटाउन थालेको भन्दै महानगरको टोलीमाथि ढुंगामुढा गरेको हो। अनधिकृत सुकुम्बासी बस्ती हटाउन यो क्षेत्रमा नगर प्रहरीसहित ठूलो संख्यामा नेपाल प्रहरी परिचालित भएका छन्।