अर्जेन्टिना साउदी अरेबियासँग पराजित

काठमाडौं- एक गोलले पछि परेको अवस्थाबाट अघि बढेर दुई गोल फर्काएँदै एसियाली मुलुक साउदी अरबियाले कतारमा जारी फिफा विश्वकपमा आइकोनिक सुरुआत गरेको छ। उपाधि दाबेदार टिम अर्जेन्टिनालाई पहिलो खेलमै २–१ ले हराएर साउदी अरेबियाले विश्वकपको सानदार सुरुआत गरेको हो।

यता, अपराजित ३६ खेलको यात्रा पूरा गरिसकेको अर्जेन्टिनाले भने यो विश्वकपको पहिलो खेलमै हार व्यहोरेको छ। खेलको नवौं मिनेटमै लियोनल मेस्सीले पेनाल्टीमा पाएको अवसरमा गोल गरेका थिए। त्यसपछि अर्जेन्टिनाले गुरेका तीन गोल नै अफसाइड भएका थिए। पहिलो हाफमा साउदी एक गोलले पछि थियो।

दोस्रो हाफको ४८औं मिनेटमा सलेह अल्सेहिरीले गोल गर्दै खेललाई बराबरीमा ल्याएका थिए। त्यसको पाँचौ मिनेटमै सलिम अल्दावासरीले सुन्दर गोल गर्दै अग्रता खोसेका थिए।

यही अग्रता जोगाउँदै साउदीले तीन अंक जोडेको हो। यही समूहको अर्को खेलमा आजै मेक्सिकोले राति पौने ९ बजे पोल्यान्डको सामना गर्दैछ। यो जितसँगै साउदीले अन्तिम १६ को यात्रा छोटो बनाएको छ।