डिल्लीबजार मालपोतका तत्कालीन उपसचिवसहित परशुराम आठ जनाविरुद्ध मुद्दा

काठमाडौं- सरकारी जग्गा व्यक्तिको नाममा दर्ता गरी भ्रष्टाचार गरेको आरोपमा काठमाडौंको डिल्लीबजार मालपोत कार्यालयमा कार्यरत तत्कालीन उपसचिव परशुराम अधिकारीसहित आठ जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दर्ता गरेको छ।

नेपाल सरकारको नाममा बाटो कायम भएको काठमाडौं महानगरपालिका–१६ को कित्ता नम्बर १३९९ को ९१.३१ वर्गमिटर जग्गा व्यक्तिको नाममा दर्ता गरेको उनीहरूमाथि उजुरी परेको थियो। आयोगले अनुसन्धानमा कानूनी व्यवस्था विपरीत नेपाल सरकारको स्वीकृति बिना नै भक्तरत्न तुलाधरको नाममा कायम गर्ने निर्णय गरी दर्ता गर्ने र निर्णय मिसिल लुकाउने भ्रष्टाचारजन्य कसुर गरेको पाइएको थियो। 

यस कार्यमा अधिकारीसहित तत्कालीन मालपोत अधिकृत सीताराम पोखरेल, नायब सुब्बा ताराप्रसाद जोशी, नायब सुब्बा प्रसाराम भुसाल, स्वर्गीय भक्तरत्न तुलाधर, शशी तुलाधर, रानु तुलाधर र दिव्य तुलाधर रहेको आयोगको ठहर छ।

सो कसुरमा स‌ंलग्न  कर्मचारी र सरोकारवाला व्यक्तिलाई अधिकतम जनही २१ लाख ३० हजार रुपैयाँ बिगो र जेल सजायको मागदाबी लिई अख्तियार दुरुपयोग अनुसन्धान ऐन, २०४८ को दफा १८ र दफा ३५ एवं भ्रष्टाचार निवारण ऐन, २०५९ को दफा ३६ बमोजिम विशेष अदालत काठमाडौंमा आरोपपत्र दायर गरिएको छ।