रुपन्देहीमा मतदान उत्साहजनक

बुटवल- लुम्बिनी प्रदेशमा सबैभन्दा धेरै निर्वाचन क्षेत्र रहेको रुपन्देहीमा बिहानैदेखि मतदाताहरू लाइनमा बसेर मत दिन थालेका छन्। 

रुपन्देहीमा प्रतिनिधिसभातर्फ ५ र प्रदेशसभा तर्फ १० निर्वाचन क्षेत्र रहेका छन्। रुपन्देहीमा १५ पदका लागि २ सय ३ जनाले उम्मेदवारी दिएका छन्। ६ लाख ३८ हजार ९ सय ५२ मतदाता रहेको जिल्लामा २ सय ८ मतदान स्थल छ भने ५ वटा अस्थायी मतदाताका लागि स्थल थपिएको छ।

कार्यालयका अनुसार रूपन्देही-१ मा प्रतिनिधिसभातर्फ २१, प्रदेशसभा १ मा ११ र २ मा १४ जना उम्मेदवार छन्। रूपन्देही-२ मा प्रतिनिधिसभातर्फ १५, प्रदेशसभा १ मा १२ र २ मा ११ जना उम्मेदवार छन्।

त्यस्तै रूपन्देही–३ मा प्रतिनिधिसभातर्फ २२, प्रदेशसभा १ मा ११ र २ मा ११ जना उम्मेदवार छन्। रूपन्देही-४ मा प्रतिनिधिसभातर्फ १३, प्रदेशसभा १ मा ६ र २ मा १२ जना उम्मेदवार छन्। 

रूपन्देही ५ प्रतिनिधिसभातर्फ १७, प्रदेशसभा १ मा १३ र २ मा १४ जना उम्मेदवार छन्। अहिले मतदाताहरु मतदानस्थलमा मतदान दिन आउनेक्रम बढ्न थालेको छ।