'मैले निर्मला हत्याकाण्ड छानविनमा लेनदेन गरेको भए झुण्ड्याइदिए हुन्छ'

कञ्चनपुरको भीमदत्त नगरपालिका–१९ की किशोरी निर्मला पन्तको बलात्कारपछि हत्या गरिएको घटना छानविनका लागि गठित उच्चस्तरीय सरकारी समितिका सदस्य हुन्, उपसचिव वीरेन्द्र केसी । घटनाबारे अनुसन्धान जारी रहँदा केसीले सुरक्षा माग गर्दै एक्कासी समितिबाट राजिनामा दिएपछि बलात्कारपछि हत्यामा ठूलै सरकारी अधिकारी संलग्न रहेको आशंका मात्र उब्जिएन, केसीमाथि नै लेनदेनमा फसेको आरोप पनि लगाइयो ।

गृह मन्त्री रामबहादुर थापासँग भेट पाउनासाथ राजिनामा फिर्ता लिएर पुनः आफ्नो जिम्मेवारीमा फर्केका छन्, केसी । राजिनामा दिनु र फिर्ता लिनुका कारण तथा निर्मलाको हत्याकाण्डमा केन्द्रित रहेर नेपाल समयका लागि धिरज बस्नेतले गरेको कुराकानी :

राजिनामा गरेको ४८ घण्टापछि फेरि फिर्ता लिनुभयो । राजिनामा दिनुको कारण खुलाउनुभयो तर फिर्ता लिनुको कारण अस्पष्ट देखियो । यति छिट्टै राजिनामा फिर्ता लिनुको कारण के हो ?

निर्मला पन्तले न्याय पाउनुपर्छ भन्ने उद्देश्यले मैले राजिनामा दिएको थिएँ । समितिको सदस्य भएको हैसियतले मैले केही कुरा गृहमन्त्रीसँग राखेको थिएँ । किनकि, मेरो नियुक्ति उहाँले गर्नुभएको हो ।

यसभन्दा पहिले कसैसँग कुरा राखेर अगाडि बढ्न मिल्दैन । घटना, समस्या र जनताको भावनाअनुसार छिट्टै प्रतिवेदन दिनुपर्छ भन्ने महत्वपूर्ण कुरा थियो । सोही ढंगले २४ भदौमा सबै सल्लाहकारसँग भेट्ने प्रस्ताव राखेको थिएँ । तर, प्राविधिक वा व्यस्तताका कारण होला भेटघाट हुनसकेन । र, १५ दिनको म्याद थपियो ।

मलाई लाग्यो, म राष्ट्रसेवक कर्मचारी हुँ । राष्ट्रले मलाई निर्मला पन्तको हत्याकाण्ड छानविन गर भनी पठाएको हो । म निर्मलालाई न्याय दिलाउने उद्देश्य लिएर हिँडेको थिएँ । त्यो उद्देश्य पूरा गर्न सक्दिनँ भने सदस्य बनेर बस्नुको फाइदा के त ?

मैले गृहमन्त्रीसँग भेट्ने अवसर पाउने भएँ भन्ने बिहीबार गृह मन्त्रालयबाट खबर पाएँ । त्यस घटनाको सबै कुरा मैले गृहमन्त्रीलाई अवगत गराएँ । घटनाको सत्यतथ्यलाई गृहमन्त्रीले गम्भीरतापूर्वक र चासोका साथ लिनुभएको छ ।

समितिकै सदस्यसँग यस विषयमा लामो छलफल हुँदा सम्पूर्ण घटनालाई सम्बोधन भएपछि गृह मन्त्रालयले आग्रह गर्यो, वास्तवमा तपाईं राष्ट्रसेवक नै हो भनेर । राष्ट्रको सेवा गर्नु मेरो दायित्व हो । राज्यले खटाएको ठाउँमा जाने र आदेश पालना गर्नु हरेक नागरिकको दायित्व हो । र, मेरो प्रमुख लक्ष्य निर्मला हत्याकाण्ड छानविन गर्नु हो ।
 

प्रतिवेदनमा उल्लेख गर्ने विषयमा असन्तुष्ट भएपछि तपाईंले राजिनामा दिनुभयो भन्ने कुरा पनि छ नि ?

घटनामा देखेका कुराहरू राख्न पाउने स्वतन्त्र सदस्यको रूपमा मेरो अधिकार पनि छ । सम्बन्धित व्यक्तिले मेरो कुरा सुनिदेओस् भन्ने थियो, जुन मैले सुनाइसकेको छु ।
 

स्थानीय अधिकारी र कञ्चनपुरवासीको आशंका छ तपाईं प्रलोभनमा फस्नुभयो कि भन्ने ?

यो कुरा सही होइन । यस विषयमा निर्मलाका पिता यज्ञराजलाई पनि जानकारी दिइसकेको छु । घटना भएको १÷२ महिना बितिसक्दा पनि अपराधी पत्ता नलाग्दा यस खालको आशंका गर्नु स्वाभाविकै हो ।

तर, म इमानदारीपूर्वक छातिमा हात राखेर भन्छु, ती नानीको विषयमा केही लेनदेन गर्नु भनेको म मान्छे नै होइन भन्नु हो । यदि मैले लेनदेन गरेको ठहरिएमा सिंहदरबार बाहिर ल्याएर जनताका सामु ठूलो अपराधी मानेर झुण्ड्याए हुन्छ ।

म गर्वसाथ भन्छु, कहींकतै प्रलोभनमा फसेको छु भन्ने ठहरियो भने म झुण्डिन तयार छु । गलत काम लुकाएर लुक्दैन, एकदिन अवश्य छर्लंग हुन्छ । मेरो गल्ती देखिएमा म बलात्कारीभन्दा ठूलो अपराधी हो ।

छानविन समितिको प्रतिवेदन आउन अझै समय लाग्ला । तपाईंको छानविनले अपराधी कता छ भन्ने देखाउँछ ?

छानविनको कुरा अहिले बाहिर नल्याउँदा राम्रो हुन्छ । छानविनमार्फत् निर्मलालाई न्याय दिलाउनु मुख्य कुरा हो । यस्ता विषयहरू सञ्चारमाध्यममा छिटो सार्वजनिक नगर्नु राम्रो हुन्छ । सबैजना मिलेर छिटोभन्दा छिटो पीडितलाई न्याय दिलाउनतर्फ लागौं ।
 

प्रहरीले विभिन्न तरिकाले घुमाइरह्यो । त्यस कारणले पनि धेरै मानिस आजित र आशंकित छन् । तथ्य कुरा के हो ?

छानविन समितिले गरेको अनुसन्धानको पाटोलाई राम्रो वा नराम्रो भन्ने विषयमा हामी प्रतिवेदन नै लेख्छौं । जनता र पीडितले नराम्रो मानेको कुरा हाम्रो लागि कसरी राम्रो होला । त्यसैले घटनाक्रमलाई विशेष रूपमा गहन अध्ययन गर्न जरुरी छ । छानविनमा जति नयाँ कुरा आउँछन्, ती सबै सार्वजनिक गर्नुपर्छ ।

जति असुरक्षित महशुस म पहिले गर्थें, आज त्यस्तो छैन । घटनासँग सम्बन्धित विवरणहरू सरकारसँग बिनाहिच्किचाहट राख्नसक्छु ।

निर्मलाको आत्माले शान्ति र उनको परिवारले न्याय पाउँछ त ?

मैले उनलाई न्याय दिनैपर्छ । म कुनै प्रलोभन, प्रभाव, दबाबमा परें भने बाँच्नुको कुनै अर्थ छैन । मैले राजिनामा दिनु, फिर्ता लिनु, यस्तो व्यवहारले मानिसहरूले मप्रति आशंका गर्नु स्वाभाविकै हो ।

कतिपय पत्रपत्रिकाले यतिसम्म पनि लेख्न भ्याए कि वीरेन्द्र केसीलाई धनगढी जान मन थिएन र सरुवा गर्नका लागि यति धेरै नाटक रचेको हो ।

यस खालको सस्तो पत्रकारिता नगरिदिन म सबैलाई आग्रह गर्छु । निर्मला पन्तको ज्यान र मृत्युसँग मेरो सरुवा साटेर बस्ने मान्छे म होला कि नहोला ? यस कारणले म धेरै पीडामा छु । त्यस्तो पनि पत्रकारिता हुँदो रहेछ ।

म एक मृत्युसँग सरुवा साटेर बस्ने मान्छे हैन । बुझ्नेले कुरा बुझेकै छन् । यो कुरालाई मैले एकदमै स्पष्ट रूपमा भनेको छु । मैले जे देखेको छु, त्यो कुरा एकदमै इमानदारितापूर्वक प्रतिवेदनमा लेख्छु ।