निर्वाचन आयोगले खरिद गरेको स्यानिटाइजर गुणस्तरहीन

काठमाडौं- मतदानका दिन प्रयोग गर्न भनेर निर्वाचन आयोगले खरिद गरेको स्यानिटाइजर गुणस्तरहीन रहेको पाइएको छ। 

खरिद गरिसकेको स्यानिटाइजर गुणस्तरहीन भएपछि स्यानिटाइजर प्रयोग नगर्न आयोगले मुख्य निर्वाचन अधिकृत र निर्वाचन अधिकृतहरूलाई एसएमएस पठाएको छ। 

निर्वाचन आयोगले मंगलबार साँझ पठाएको एसएमएसमा प्राविधिक प्रतिवेदन अनुसार स्यानिटाइजर प्रयोग गर्न अयोग्य देखिएकाले मतदान केन्द्रमा नपठाउन र पठाइसकेको भए सम्भव भएसम्म फिर्ता पठाउन भनिएको छ।उक्त स्यानिटाइजर प्रयोग नगर्न समेत भनिएको छ। 

आयोगका प्रवक्ता शालिग्राम शर्मा पौडेलका अनुसार ल्याब टेष्ट गर्दा उक्त स्यानिटाइजर गुणस्तरहीन रहेको पाइएको हो। स्यानिटाइजरमा हुनुपर्ने न्यूनतम गुण नपाइएको र त्यसले अन्य समस्या निम्त्याउन सक्ने भन्दै आयोगले उक्त स्यानिटाइजर प्रयोग नगर्न सूचित गराएको छ। 

आयोगले पठाएको एसएमएसमा भनिएको छ,‘प्राविधिक प्रतिवेदन अनुसार स्यानिटाइजर प्रयोग गर्न योग्य नदेखिएकाले मतदान केन्द्रमा नपठाउनुहुन र पठाइसकेको भए सम्भव भएसम्म फिर्ता गर्न/गराउनु हुन र स्यानिटाइजर कसैले पनि प्रयोग नगर्न जानकारी गराउनुहुन अनुरोध छ। निर्वाचन आयोग।’