प्रदेशस्तरिय क्रिकेट छनोटमा नवलपुर ३७ रनले विजयी

पोखरा- वाईवाई गण्डकी प्रदेश स्तरिय क्रिकट छनोट प्रतियोगितामा नवलपुरले तनहुँलाई पराजित गरेको छ। प्रादेशिक क्रिकेट संघ, गण्डकीको आयोजनामा पोखरामा जारी खेलअन्तर्गत आइतबारको खेलमा नवलपुर ३७ रनले विजयी भएको हो।

टस जितेर पहिला व्याटिङ गरेको नवलपुरले पुरा ५० ओभरको खेल्दै ९ विकेटको क्षतीमा २ सय १२ रनको विशाल योगफल तयार पार्‍यो। खेलमा म्यान अफ द म्याच भएका नवलपुरका दिपक डुम्रेले ११५ बलमा ८५ रनको महत्वपूर्ण पारी खेले। टिमका लागि विज्ञान पाण्डेले ३८ रन जोडे। तनहुँका बलहरु प्रदीप अर्यालले ३ तथा सचिन राज अधिकारी र रिन्जिन लामाले समान २ विकेट लिए।

जितका लागि २ सय १३ रनको लक्ष्य पछ्याएको तनहुँले पुरा ओभरमा ९ विकेट गुमाउँदै १ सय ७६ रन बनायो। तनहुँको तर्फबाट  पासाङ दोर्जे तामाङले सर्वाधिक ४३ रन बनाए। रिन्जिन लामाले ३५ तथा पुस्कल गौडेलले २२ रन जोडे। नवलपुरका बलरहरु सगुन सापकोटा र शिशिर भुषालले समान ३ विकेट लिए। अपराजित पौडेलले १ विकेट लिएका थिए।